Ama Tobo Takuju Muncul Lai

AMA Tobo ilang talalu lama. Baitua ada pakariang laen di luar kampong. Sonde ada yang tau, dia pi beken apa. Ina Feok ju ke ilang begitu sa. Mamtua deng Ama Tobo sonde kas tau sapa-sapa, dong dua pi mana.

Bai Ndu kakodok stenga mati. Baitua sonde ada par minum laru lai. Tiap hari hanya duduk di pak laru ko maleo pi ujung jalan. Sapa tau takuju te AMa Tobo pung batang idong muncul.

Ma andia. Ke tunggu kucing ada tanduk. Bai Ndu tunggu sampe ulang taon, AMa Tobo sonde ada. Parte lama to. Dong dua dari kici su sama-sama. Pi fiti burung atau pakolete ikan di pante, dong pasti sama-sama.

Ganggu orang pung anak nona, itu Ama Tobo deng Bai Ndu pung fak. Sampe buang jagong di Ina Feok, dong ba uji. Ma Ama Tobo menang. Ina Feok toto Ama Tobo pung jagong. Andia ko Bai Ndu tar bisa lupa sang Ama Tobo.

Bangun buta, Bai Ndu balom sikat gigi. Ada yang toki pintu. Baitua pamalas bangun. Pikir pasti ana kici dong yang datang ko mau salamat lebaran. Ini anak kici dong keluar maso rumah fii kantong ko salamat. Dong pasti pikir Bai Ndu ju iko lebaran ke paman di keos ujung cabang.

Baitua pamalas bangun. Ma karna pinto kena toki taru, Bai Ndu lompat bangun. Mata masih silo, Bai Ndu hela kas tabuka pintu.

Ama Tobo badiri di muka rumah. Bai Ndu sonde percaya. Baitua pikir ini pasti mimpi. Ama Tobo yang ilang lama, takuju muncul. Bai Ndu mus kurfei sang dia ko tanya, bagini lama ilang di lobang mana. *