Tapaleuk, Katong Musti Dukung

POS-KUPANG.COM -- Ini hari Ama Tobo sonde bisa tidor siang karna hujan terus te baptua paksa tidor ju sonde sono. 
Padahal, dia  biasa kalo hujan bagini pasti tidor sono. Tao kenapa ini hari baptua ke lain. 

Pas hujan berenti Tobo pung mengantok su ilang, jadi dia bangun pi duduk di emper samping. 

"Ama, kenapa sonde tidor, nanti malam mengantok kode ko alasan sonde bantu kerja, " Ina Feok togor dia pung laki bagitu karna biasa tiap malam dong dua harus mete buat kue ko jual di pasar. 

Baca juga: Tapaleuk, Ama Tobo Son Abis Pikir

Dong dua balom habis baomong te Bai Ndu su mereka nere muncul dari depan ko babatok ke sengaja mo jalan lewat bagitu. 

"Ini hari lewat sa o, klu sonde singga na mulai besok jang lewat depan sini lai, " Tobo ancam Bai Ndu supaya singgah. 

Ama Tobo dari pagi sonde maale sirih pinang karna tambako makan su kosong, andia ko pas Bai Ndu lewat dia sengaja baancam ko Bai Ndu singgah supaya dia kesempatan minta tambako. 

Bai Ndu su tao kalo Ama Tobo maen ancam itu pasti ada sesuatu. Kalo sonde minta siri pinang atau tembako, pasti mo ajak pi lingkar. 

Bai Ndu langsung belok masok karna dia juga rencana mo singgah ko cari minum kopi. 

Biasa kalo dia singgah tu, jatah kopi su jelas. 

Ama Tobo su senang karna bisa dapa sirih pinang deng tembako ju. Tobo pung sirih pinang su tiga hari di saku celana, karena mo makan harus ada tembako. 

Ama Tobo deng Bai Ndu carita sampai testa dong bakerut karna dong dua dengar ada mau kegiatan PON di EnTeTe taon 2028 na. 

Dong dua tu kuat makan sirih pinang deng tambako tapi kalo soal informasi dong dua ju sonde ketinggalan. Bai Ndu sa sempat omong bilang dia tadi pagi dengar pemerenta mau perbaiki stadion di Oepoi sana dengan dana seratus miliar lebe.

"Bosong dua ini omong sama ke pejabat teras dong. katong masyarakat kecil ini tenang sa ko urus katong pung hidop," Ina Feok malerok dia pung baitua.

Biar bagitu ma, mamtua tetap harus bikin kopi ko kasi dia pung laki deng Bai Ndu.

Ama Tobo dengan Bai Ndu sonde talalu pusing deng Ina Feok yang ada sambung dar dapur.