Ama Tobo Mulai Maen Fesbuk

POS-KUPANG.COM - Ama Tobo kapala saki. Ina Feok dari kemarin sonde baomong deng baitua. Mamtua ba'iu berat dari kemaren sore.

Tadi malam tidor ju bale belakang. Ama Tobo sonde berani korek. Baitua su tau kalo ada beken salah. Lu korek tu yang cari hal. Mamtua kalo su maruak datang, nenek moyang dong ju togor sonde ontong,

Dari kemarin pagi, Ina Feok minta doe ko pi tarek rambut. Besok malam cucu mau sambut baru, jadi mamtua musti tampil maksimal. 

Na mau pi salon ni butu doe. Ama Tobo pung doe abis. Dua hari lalu, baitua kala bataro ayam. Pas Ina Feok minta doe, Ama Tobo rogo saku, kosong semua.

"Beta dapa doe di mana ni. Lu kas pinjam ame kas beta sadikit dolo. Nanti beta maen slot ko dapat baru beta ganti." 

Bai Ndu ke sonde dengar. Baptua malas tau sa. Dia su tau, kalo Ama Tobo minta doe bagini, artinya Ina Feok ada ba'iu deng dia.

"Lu liat beta beken apa ni. Beta lagi beken kontek di fesbuk. Doe dolar tapo'a nanti kalau dia viral. Lu jang talalu baganggu. Lu ada HP tu, beken fesbuk su. Nanti doe dapat kaboak."

Ama Tobo sonde bisa omong lai. Bapatua minta hotspot dari Bai Ndu ko mulai beken. Sonde mau tau. Pokoknya musti dapat doe. Kalo sampe besok sonde kasih, Ina Feok bisa usir dia ko tidor di emper. *

Baca berita POS-KUPANG.COM lainnya di GOOGLE.NEWS