Lu Kenal Veronika Ko?

POS-KUPANG.COM - Ama Tobo serius mati di atas dadegu. Duduk jaga burung di sawa, baitua dengar lagu dari HP.

Ma andia. Dari pagi hanya satu lagu. Lu kenal Veronika ko? 

Ina Feok yang baru datang antar makan siang su kakodok stenga mati. Maitua langsung masparak sang Ama Tobo.

"Lu sonde ada lagu laen lai ko? Apa ko dari tadi hanya itu lagu sa. Lebe bae lu kasmati, ato beta fadok sang lu deng ini lalepak."

Ama Tobo sonde toe. Baitua putar lebe kuat lai.

Lu kenal Veronica ko?

Veronica yang om Strom Pu Anak Nona Ni Ko

Om Strom yang biasa

Tambal jalan lobang tu ko?

Bukan yang itu

Tapi Mama Maria pu Suami

Na kasi kenal saya deng Veronica dulu

Dia pu Mama suka Laki Laki

bisa bahasa Inggris

Bahasa Inggris kecil

Coba satu kalimat

Bluetooth device has connected successfully

Pi ko Mama Maria kasi

Kursus Lu pake strom

Ama Tobo takuju ke rasa dingin di kandok. Malerok pi balakang, Ina Feok pe'e mata ke su mau tapalocok kaluar. Ma baitua sonde toe.

"Lu tau ko sonde. Karena beta putar lagu Veronika, dari tadi sonde ada satu pun burung yang datang padi. Mungkin dong taku deng Om Strom." (eko)

Baca berita POS-KUPANG.COM lainnya di GOOGLE.NEWS