Tapaleuk, Ama Tobo Son Abis Pikir

POS-KUPANG.COM, KUPANG - Sakarang ini daon kayu jatoh sa samua orang su tahu karna pasti viral di medsos.

Ina Feok pulang pasar balom masok rumah te ada duduk di bawah pohon ko menghayal. Dia ada pikiran perkembangan sakarang ini buat orang dudu ju son tanang.

"Ina karmana su berapa hari ini kanapa pake ojek tarus bawa sayur pi pasar. Biasa beta lia ada orang bawa oto ato motor ko datang muat di katong pung rumah," Ama Tobo sengaja pi dudu deka dia pung maitua baru omong palan-palan. 

Ina Feok su tao kalo dia pung laki gaya bagitu pasti ada mao itu.

"Lu ini hari foe apa ko batanya. dar kamarin beta pake ojek antar sayur di pasar lu son tanya," Ina Feok sambung dia pung laki.

Baca juga: Tapaleuk, Masalah Dar Dolu

Tobo balom jawab Ina Feok gas tarus. "Ama lu ini b su bilang karedit motor su ko pake antar sayur pi pasar," Ina Feok mulai singgung motor lae. 

Tobo  hanya diam sa, dia langsung bangun ko ame kaca spion ko mo cabut dia pung jenggot. 

Dong dua laki bini masih basambung mulut te ada anjing gonggong, Ina Feok maloi te Bai Ndu su nere-nere datang lai.

"Ama deng Ina basong dua ada dapa dengar barita soal ana yang bilang su lulus TeEni tapi takuju dapa batal ko," Bai Ndu taro dua tangan di belakang baru datang dekat Ama Tobo.

Ina Feok dengar bagitu langsung sambung bilang dong tadi di pasar itu ada rame baomong soal TeEni.

"Abis itu masalah karmana su. tadi pagi beta di pasar ada orang dong baomong ma beta takut sambung," Ina Feok bangun pi dapur ko buat kopi kas Bai Ndu deng dia pung laki.

Baca juga: Tapaleuk, Kalender Doi

Ama Tobo yang pegang kaca spion son jadi cabut dia pung jenggot, karna Bai Ndu su datang bagitu pasti nanti duduk ko baomong rame.

"Beta baru dapat dengar memang ada info di medsos bagitu, hanya tadi juga bilang su ada penjelasan tanggapan dari yang berwenang," Bai Ndu omong agak tinggi karna dia pung cucu su carita kasi dong.

Ama Tobo deng Bai Ndu carita sampai testa dong bakerut karna itu kasus bilang baru terjadi na.

"Bai Ndu, beta ini son abis pikir karna baru pernah dengar kasus bagitu," Tobo kasi keluar Saliti ko bagi kas Bai Ndu karna Ina Feok su datang antar kopi. (oby lewanmeru)

Ikuti Berita POS-KUPANG.COM lainnya di GOOGLE NEWS