Tapaleuk, Masalah Dar Dolu

POS-KUPANG.COM, KUPANG  -  Su lama sakali katong son dengar ame Ina Feok pung suara. Dia memang su beroba makanya katong son dengar dia mangomel dia pung suami lai. Padahal amper tiap hari dia biasa boto-boto dia pung suami kalo ada yang salah dia pung mao.

Tapi tao setan apa yang nae kana ko ini hari mamtua pulang dar pasar ribut matipung, sampe-sampe tetangga dong ju lari kaluar ko dengar. 

Ina Feok dong salama ini tenga di dekat jalur 40 sana, jadi kalo mo pi pasar ato mo pi balanja musti pake grab ato maxim.

Dia pung laki ama Tobo itu hari ada motor ma tao kanapa diler su tarek kambali.

"Ama lu itu hari beta su bilang ko rajin setor itu motor pung karedit ma lu son toe ame beta pung omongan. Sakarang lu rasa su, katong susah  bagini baru lu bingung,".

Baca juga: Tapaleuk, Kalender Doi

Ama Tobo yang ada dudu di muka rumah bangun ko jalan pi belakang karna ada tetangga dong ju muncul di situ.

"Ina bakalae deng sapa, su kanapa ko pagi-pagi su baribut ini," Bai Ndu su muncul dari samping Tobo dong pung rumah.

"Son tao ama e, beta ju bingung ko bar bangun te mamtua su mangomel soal motor," Ama Tobo kastao di Bai Ndu.

Ina Feok ada dengar jadi dia datang dekat Ama Tobo deng Bai Ndu yang su dudu di bale-bale samping rumah.

 "Bosong dua ini dengar dolo, beta tadi pagi bajual di pasar itu orang dong bacarita kalo ada anak kacil mati. Padahal itu ana baru lahir, hanya katong son tao kanapa ko bisa bagitu," Ina Feok mulai omong soal berita bayi yang meninggal itu.

Bai Ndu deng Ama Tobo ju sama ke kaget. Dong dua baru mangarti kalo tadi Ina Feok tensi itu karna kenapa bisa itu anak kacil mati.

Baca juga: Tapaleuk, Hitung Doi

"Kalo yang beta dengar itu kasus di SoE sana, bilang karmana ko habis lahir itu anak mati. Katong kasian tapi abis mo karmana lai," Bai Ndu sambung karna dia pung ponakan satu su cerita kasi dia.

"Abis kanapa sampe bagitu," Ama Tobo panasaran.

Kali ini Bai Ndu yang dapa banyak info jadi dia carita terus. "Beta ju dengar bilang mungkin terlambat bawa datang di Kupang ko rujuk, hanya balom tao batul itu info ato son," Bai Ndu omong ma dia pung mata lia di Ama Tobo pung saku celana yang biasa taro rokok.

Dong tiga bahas ini masalah bayi yang mati sampe siang ju balom abis.