Tapaleuk
Jang Talalu Tatafik
Kalo dia su pulang dari laut pasti yang ada hanya mangomel dia pung istri. Tapi tao kanapa ko ini hari dia diam-diam sa
Penulis: Oby Lewanmeru | Editor: Edi Hayong
lihat foto
Tapaleuk :
Jang Talalu Tatafik
AMA Tobo pung sifat dari taon lalu son tao barubah. Padahal dia ini su biasa iko pelatihan jadi nelayan andalan.
Dia kalo mo apa harus langsung ada. Andia ko dia di rumah tiap harus bikin Ina Feok sengsara batul.
Kalo dia su pulang dari laut pasti yang ada hanya mangomel dia pung istri. Tapi tao kanapa ko ini hari dia diam-diam sa.
Ina Feok balom pulang dar pasar te su siang ,biasa jam bagini Tobo pung jam minum kopi.
"Ama lu ini hari pulang sedu e. Tadi beta lewat liat lu ko makanya beta singga," Bai Ndu sengaja datang dekat karna ada mo minta satu batang.
"Ama e, lu kalo mo minta rokok na langsung inti sa ko jang batageo lai," Tobo bangun ko sorong rokok kas Bai Ndu.
Son lama te, Ina Feok su turun bemo ko jalan masok di rumah.
Ina sengaja son togor Bai Ndu deng Tobo yang ada dudu di teras situ.
Sampe di dalam rumah baru Ina Feok sangaja batareak tanya dia pung sendal yang biasa pake di rumah. Tobo langsung jawan bilang ada di kolong dadegu di samping rumah.
"Ina e suara itu ke ada bakalae deng sapa, su kanapa ko siang bolong bagini baribut," Bai Ndu su biasa kalo dia datang ko Ina Feok ada tensi dia suka basambung ju.
"Ama e, beta bukan bakalae te beta ada omong lu pung sodara ni te dia pung kelakuan biasa pulang karja suka marah-marah. Beta tadi ju sangaja karna beta lihat dia diam-diam na," Ina Feok kastao Bai Ndu.
"Nah,ko dar tadi beta datang ju Ama Tobo ada dudu tanang sa. Mungkin ini hari dapat ikan banya ko ato kanapa," Bai Ndu omong bisik-bisik ke Ina Feok.
"Son tao biasa dia pulang suka pi dudu di tampa bola guling sana, ma su dua hari ini sode pi. Soalnya beta su kastao lu pung sodara itu ko jang pi tarus di tampa bola guling supaya jang talalu ke orang tatafik sa" Ina Feok omong kuat-kuat.
Ama Tobo yang dengar dia diam-diam sa soalnya bulan Desember tu pas kunci taon dia pung bini su nasehat dia ko bertobat jang maen bola guling lai.
"Beta su mofak bagini, beta su tao mana yang bae deng yang son bae. Sakarang beta musti fokus karja supaya bisa persiapan hati tua nanti," Ama Tobo su sama ke orang yang mengaku dosa. (oby lewanmeru)
