Babujuk Pi Dokter

Babujuk Pi Dokter

MASIH  pagi buta, Ama Tobo bangun tidor pas mau pi kamar mandi ju ada orang di dalam.

Pas Ama Tobo mau tanya ju dapa dengar Ina Feok dar dalam ada muntah-muntah bar suara bikin Ama Tobo rasa kasian.

Sonde lama ju Ina Feok keluar dari kamar mandi deng muka pucat bar su noe sampe Ama Tobo bantu topang karna su hampir jato.

"Ina sakit apa, katong pi pariksa di pariksa di dokter puskesmas sa, biar tau sakit apa, jang bikin beta pikiran te Ina sakit ni beta yang susah," Ama Tobo tanya sambil pegang Ina Feok pung kening.

Ina Feok su tahan sakit tambah dengar kata pi dokter ju langsung emosi ju langsung menyao.

 "Kalo sakit mending istirahat babae di rumah sa, tausah pi dokter, nanti dong su diagnosa baru omong katong penyakit aneh-aneh, padahal katong ni sakit batok pilek biasa tapi bikin ke penyakit luar biasa ni," Ina Feok su jawab deng tensi.

"Ina e, belom sampe dokter ju Ina su pikir yang aneh-aneh ni, nanti baru penyakit pegang batul baru mata terang, na mari su katong siap pi pariksa biar tau ada sakit apa, supaya cepat sembuh," Ama Tobo bujuk Ina Feok biar mau pi dokter.

"Pokoknya beta sonde mau pi dokter, Ama Paksa karmana ju beta tetap sonde akan pi, supaya Ama tau, sebelum dokter pariksa, pasien harus wajib Rapid Tes, nah katong ada sakit begini, baru dia punb hasil reaktif, itu katong sonde jadi pariksa tapi lanjut PCR, na kalo positif, katong harus isolasi mandiri," Ina Feok jawab panjang lebar sampe ama Tobo angguk-angguk kepala.

Ama Tobo ju sonde hilang akal ju langsung tanggapi .

"kalo ina pung kondisi sakit muntah-muntah, muka pucat, badan panas, baru sonde mau pi pariksa di dokter, nanti tetangga curiga dan sebar isu bilang Ina su kena Covid-19, nanti yang datang jemput langsung Satgas Covid-19 pake baju putih tatutup dari atas sampe bawah, dong pi bawa terus dan kurung Ina dalam ruang isolasi di rumah sakit sana, abis keluarga ju sonde boleh jenguk," Ama Tobo gaya kas takut Ina.

"Eh... Ama... Omong yang betul sa, jang tipu deng beta, itu satgas covid su bubar, karna pemerintah sonde punya anggaran lai dan sakarang orang sonde wajib masker, presiden sa omong, masa pemerintah yang kici-kici dong mau melawan presiden ni," Ina Feok omong sambung ma sambil tahan muntah.

"Kalo begitu Ina yang cantik dan baik hati siap su katong pi dokter biar tau sakit apa, orang bilang lebih baik mencegah daripada mengobati," Ama Tobo bujuk rayu Ina Feok pung hati biar mau pi dokter.

"Ho, ama menang su, mar katong pi dokter sakarang," Ina Feok pung hati langsung luluh pas dengar Ama Tobo pung bujuk rayu. (Christin Malehere)