Su Sampe Mana o

Su Sampe Mana o

ITU siang Ama Tobo deng Bai Ndu bajanji mau pi kantor lurah, sebenarnya pi dar pagi hanya Ama Tobo tidor sampe matahari bakar ame.

Dong dua stell rapi deng sapatu mangkilat modal lap deng kaen basah dua orang babonceng manuju pi kantor lurah.

Dong pi sana tujuan untuk kas maso barkas ko mau dapat relokasi pi rumah bantuan, te dua orang pung rumah su satu tahun lebe kana saroja balom tau dapa kas pindah ju.

Sampe sana orang sonde talalu banyak lai sebagian su urus abis ko su bale

"Ama batul ko sonde ni katong datang disini, ini sonde ada orang lai ni, " Bai Ndu tanya di Ama Tobo.

Ama Tobo sonde bajawab lai langsung tarek Bai Ndu pung tangan ko dong dua masok pi dalam kantor lurah, sampe dalam dong dua langsung urus samua kasih beres abis langsung bale.

"Dari mana o rapi bagini, tiap hari rapi sa lu sakarang, " Ina Feok sambut ame Ama Tobo pas masok pintu rumah.

"Beta dari kantor lurah pi kasih masok barkas ko dong bilang katong mau dapa kasi pindah tu, dia pung istilah apa le relokasi ko apa tu, " Ama Tobo sambung ame Ina Feok.

Dengar itu Ina Feok langsung pikir dalam hati, soalnya Ama Tobo bola bale kas masok barkas di kantor lurah ni su mau saribu kali ma dong balom tau dapa pange ju. "Ko yang dulu-dulu kasih masok tu balom lengkap ju ko, " Ina Feok tanya ma tangan ada balincah ulek bumbu.

"Sonde tau lai, tau itu rumah bantuan saroja su sampe mana o su kasih masok berkas ulang-ulang ju sama sa, katong masyarakat kacil ni hanya bisa tunggu sa kapan pamarintah dong pange na itu su, " Abis omong Ama Tobo langsung star motor ko pi pancing, babtua sonde tobat-tobat. (Berto Kalu)