Simpan Bae-Bae Pakaian Dalam

 Simpan Bae-Bae Pakaian Dalam 

PAPAGI buta Ina Feok dan Ama Tobo bajalan pi di pasar Inpres ko beli barang-barang rumah tangga.

Dong dua pi pasar bagonceng pake motor Astrea. Su sampe di pasar, Ina Feok langsung borok banyak barang-barang dapur dong ke piring, gelas, sendok dan barang dapur yang laen dong.

Sonde lama, Ina Feok liat pakaian dong bagus-bagus, mamtua langsung borok beberapa potong pakaian.

Su habis balanja, dong dua langsung pulang. Ina Feok karena takut balanjanya sangat banyak, dia sambunyi barang yang laen dong di belakang.

Ama tobo yang curiga, bilang sayang lu ini hari balanja ke banyak talalu e.

"Lu beli apa sa ni," Ama Tobo tanya mamtua deng nada halus.

Karena takut bapatua marah, Ina Feok hanya bilang ke bapatua kalau ini hanya plastik dong yang besar sa.

Sampe di rumah, karena masih curiga deng mamtua, ama tobo langsung paksa buka ini plastik dan lia-lia ini barang dong langsung teriak.

"Mamtua ew, kenapa kow lu beli pakaian banyak talalu ni, tadi katong hanya mau pi pasar tu ko beli barang dapur dong sa, lu talalu betul," ama tobo su nada kasar karena mamtua beli sonde sesuai bapatua pung mau.

"Lu beli banyak-banyak ju sama sa, nanti lu sonde pake yang laen dong," lanjut ama tobo tegur seng mamtua.

"Bapa sayang e, beta minta maaf, beta beli tamba pakaian ni karena kemaren dulu ada berapa potong beta pung pakaian dalam dan beberapa baju ada hilang," Ina Feo mulai omong halus deng bapatua.

Makanya kalau jemur pakaian tu bae-bae, lu pikir katong cari uang sonde cape na.

Bai Ndu yang lewat sonde sengaja lia Ama Tobo yang lagi minum kopi di dong pung teras rumah sambil omong-omong sandiri.

"Tobo lu kenapa ko omong sandiri, lu gila kow," Bai Ndu sengaja tagor bapatua.

"Sonde Ba,i Ndu, beta pung mamatua beli pakaian banyak tamba lai dia pung pakaian dong ada hilang ni," ama tobo respon deng Ba,i Ndu.

Tobo e, bosong harus jaga bae-bae pakaian dong, karena kemarin beta baca barita di korang, polisi dari Polsek Maulafa dong ada tangkap ana-ana bawa umur dong yang curi pakaian dalam dan sandal japit.

"Beta hanya kasitau bosong sa, supaya kalau mau pakaian dong aman, malam-malam jang jemur di luar rumah, kalau tidak besok pagi lia sonde ada lai," Ba,i Ndu pesan seng Ama Tobo langsung jalan terus. (Rey Rebon)