Jangan Asal Beli Barang 

 Jangan Asal Beli Barang 

 INA Feok karna su tau pegang HP android ni, setiap hari karja ju wajib HP salalu simpan di saku calana.

Ama Tobo bale dar pangkalan ojek lewat mamtua pung depan muka ju son togor ame bapatua. Mamatua sibuk kotak katik dia pung HP J2 Prime tu.

"We nene sihir, lu son bisa maloi ame b ju kow, lu maloi terus itu HP," ama tobo mulai marah mamtua

Sonde puas deng mamtua pung gaya, Ama Tobo sonde pake minta, dia langsung rampas itu Hp dan lia padahal mamtua ada pesan barang-barang lewat online.

"Tuher ew, mamtua, Lu pikir dolo baru pesan itu barang-barang dong, karena ada barang yang bae dan son bae," Ama Tobo mulai nasehat seng mamtua

Son puas deng mamtua, Ama Tobo omong tambah lai, "mamtua e, mau belanja sakarang lewat hp atau langsung ju hati-hati jang asal beli barang," Ama Tobo tambah kasih nasehat mamtua

"Ko kenapa lu larang-larang seng beta, atau lu sonde mau beta beli ini barang-barang dong," mamtua su mulai marah Ama Tobo

"Sonde mamtua e, kamarin tadi pagi beta lia di berita, orang Bea Cukai dong ada bakar barang-barang dong yang ilegal dan kasi tumpah minuman ju, makanya b kasih inga Lu supaya kalau mau beli barang ju, lia bae bae," Ama Tobo mulai omong lembut deng mamtua. (Rey Rebon)