Koepang Tempo Doeloe

PARICUK, farujuk, harnois, bonte balau, makfafiti, makdadoto, raroso, kadeluk, avek, papoko, podak, gargantang, manoso, farek, harbabiruk, tafruik, maksaseti, makfafiti, makrarapak, makdaditi, batafeo.  

Tapekong, lu'u la'a, ba'i kuma, kalamis, faruju, iskarobis, dadaki, hola, alpaka, pata mayang. Kake'ek, tahedek, batambi, kamomos, karmencong, kaboak, tatafik, tarket, fafake, bangka, matono, malata, malenggang. Tapaleuk, konto, sonto, be'ol, lote.

Masnana'ok, manoso, sono, bamengge, karnois, katulak, re'e, itam marege, ganggoek, babonteng, kaskaduk, tar ontong, sedu, farek. Te'e, hela, ru'i, makamiung, malele, maloi, tasese, tarombak, kadeluk, fafudek, lelak, nodek, siklalotik. Nyadu, susi, bu, ba'i, maitua, baitua, beta, lu, botong, bosong, kitong, kotong. Sonde, toe, akurang.   

Itu bahasa Kupang dong. Talalu banyak bahasa Kupang yang Ama Tobo su lupa. Ama Tobo ingat kemarin Ama Ishak Luitnan bekin buku Koepang Tempo Doeloe. Ama Tobo hanya dengar dong baomong sa. Ternyata Kupang pung bahasa ju sonde kalah deng di Jawa dong. "Ba uji sa. Kitong ju sonde kalah na. Dong bilang su ada yang bekin kamus bahasa Kupang na."

Ina Feok takuju dengar Ama Tobo omong bagitu. Mautua tiap hari omong ma sonde sadar, kalo itu ju kekayaan. Dia pikir itu bahasa pasar jadi sonde boleh pake na. Padahal, sakarang bahasa Kupang tu orang mulai pake di mana-mana na.

"Sakarang tergantung pamarenta sa. Mau beking apa ini bahasa dong. Duduk ko tanganga ko atau mau bekin sesuatu. Ama Isak sa su beking buku. Kas ingat kitong bilang, dolo kitong ju punya pejuang. Punya orang besar ke Pangeran Diponegoro. Kitong ju punya bukti, Indonesia ada ju karena kitong. Jang maen-maen oo." (sipri seko)