Jang Asal Omong Sa
AMA Tobo pegang deng kertas kardus. Ma hari ada bapanas baptua jalan sonde barenti. Ma andia, baptua pung tangan kanan pegang kardus kipas-kipas muka deng badan. Baptua pung baju kaos putih basa kana karingat. Untung sa son pake calana panjang warna itam. Ini calana baptua pung calana andalan untuk pi pasiar.
Baptua hanya pake kaen warna merah garis-garis. Ma karna panas pung karja, kaen tua lipat sampe di paha. Baptua malas tau terus bajalan. Tartau foe apa, tua pi iko itu ana muda yang bademo. Itu ana dong bademo saratus hari karja Presiden SBY deng dia pung wakil Boediono.
Baptua iko tarus itu ana muda dong bajalan. Beta hanya mo dangar basong batareak apa. Baptua iko tarus boto-boto sandiri. "Awii, basong ana muda batareak sampe batang leher dong karing. Batareak sampe suara dong amper son dapa dangar. Biar mathari nae sampe atas kapala basong batareak tarus. Basong memang hebat. Ko ana muda na. Tanaga mas bagus. Ini dolu namanya ana muda. Dong ana muda memang paling kritis. Dong karitik tarus pamarenta."
Baptua pung kaki su cape bajalan, ko dudu talepo di bawah pohon duri. Adu bet son sanggup bajalan lai. Son tau hal, pas baptua baomong ada sat ana muda dapa dangar. Itu ana muda langsung sambung mulu.
"Kalo su tua kakaluk kanapa son mo dudu diam di rumah. Kanapa manoso bajalan. Ini ana muda baomong ma dia pung muka pia lia tampa laen. Maksodnya supaya Ama Tobo son dapa dangar dia pung baomong. Ma son tau hal, baptua rasa tarsinggung langsung pange itu ana muda.
"Woe nyong, lu deka sini do," Ama Tobo pung cara pange su sama ke ana geng dong. Tua pung muka karing mo mati.
Dangar Ama Tobo pange, ini ana muda son manyao ma dia jalan pi deka Ama Tobo. Ini ana muda pung badan ju faeng mati. Otot tangan dong baisi.
Ama tobo dalam hati pikir ini ana muda mo taku sang dia. Ini ana muda pung muka karing. Su deka Ama Tobo ini ana muda batanya, kanapa pange beta.
Ama Tobo langsung ilang gaya. Muka tadi karing langsung sanyum. Lia tua pung muka sanyum, ini ana muda langsung baomong. Heeee.....ko tadi muka karing, sakarang sanyum. Sapa yang sanyum sang Ama. Padhal tadi baptua pange ini ana muda, maksudnya mo masparak. Ma sond jadi lai. Ini ana muda bale gartak Ama Tobo langsung daun, ke tikus kana siram aer dingin.
"Bagini bu. Tadi bet pange sang bu. Bet hanya mo tanya sa. Kanapa bu son iko demo deng ana muda yang laen. Itu sa maksud pange bu," baptua pung otak memang capat baputar.
Ini ana muda dangar, Ama Tobo baomong langsong manyao. "Itu dong pung urusan. Bet pung urusan laen. Bet hanya kastau sang ama sa, lebe bae jalan pulang su. Jang dudu di jalan." Abis baomong, ini ana muda langsong tahan bemo nae pi walikota.
Ama Tobo dangar ini ana muda baomong ke pikiran. Maksudnya apa itu ana pung omong. Pangaruh taku pung karja. Ama Tobo ju langsung tahan bemo nae ko pulang. Dalam bemo, baptua dudu diam sa. Biasanya kalo baptua nae bemo dangar musik, dia pung kapala deng kaki bagoyang. Ma bar ini kali tua dudu diam sa.
Tiba-tiba, tua batareak, kiri-kiri. Bemo langsung stop. Kas abis doi di konjak, baptua langsung jalan pi rumah. Samtara bajalan, tua mas pikiran itu ana muda pung omong.
"Ahhhh, parsetan deng lu pung omong. Sapa mo toe sang lu," Ama Tobo baomong sandiri. Bet hanya mo kas inga itu ana muda pung omong waktu demo. Sakarang basong batareak manganga sampe gargantang karing. Basong baomong pamarenta pung sala samua. Ma bet kastau sang basong. Jang sampe beso-beso basong jadi pajabat basong pung parilaku lebe jahat lai. Inga ooo kalo baomong, jang hanya bua mulu enak saa. Ma basong pung kata-kata yang kaluar dar mulu manganga, basong asal omomg sa. Itu dia pung nama batarea mulu son jaga badan. (reddy ngera)
