TAPALEUK :  Tobo su taku kana tangkap

TAPALEUK :  Tobo su taku kana tangkap

POS-KUPANG.COM, KUPANG - Su mo sat taon ini Ama Tobo  son suka minum moke lai. Padahal, dia biasa suka dudu-dudu di jembatan deka Bai Ndu pung rumah ko dia pung bestie dong.

Kalo dong su dudu minum pasti ada yang buat kaco.

Bukan Ama Tobo sa, ma Ina Feok ju sakarang fokus kerja.‎ Ina Feok biasa suka kasi mimpi di dia pung kawan di pasar ko isi KP.

"Basong dua ini kanapa ko su mo satu bulan ni katong cari ko mo togor sa susah," Bai Ndu tanya dong dua .

Memang su hamper satu bulan Tobo ada dapat order buat kandang ayam jadi son pernah ada di rumah. Dia ju sonde pernah pi dudu-dudu di tampa dong ana muda mejeng.

Dia biasa jalan pi Bai Ndu, ma karna sonde pi andia ko Bai Ndu datang cari.

"Ama e, bosong dua ada tasibu apa, ko katong datang di rumah son pernah katumu. Ini hari beta datang baru lia bosong dua ni. Ada acara apa ko bosong dua son pernah di rumah, " Bai Ndu tanya tarus.

Ama Tobo yang su bosan, langsung jawab bilang dia sakarang fokus kerja soalnya sakarang karna taon depan ini nanti susah kalo son karja. 
"Katong harus disiplin soalnya kalau sonde bagitu sapa yang mau kasi makan fare," Tobo jawab bagitu.

Ina Feok dengar langsung buang sapu lidi ko lari datang ko tanya dia pung laki.

"Ama e, baomong jang sama ke orang bakalai. Nanti tetangga dengar bilang katong kalo su di rumah na mulai baribut su," Ina Feok su duduk dekat Bai Ndu.

"Ina, bosong dua ada dengar ko sonde bilang polisi dong ada tangkap orang yang narkoba," Bai Ndu omong palan-palan.

Tobo langsung sambung bilang dia tadi di tampa karja ju ada dengar bagitu. 

"Makanya, beta su rem-rem te,itu hari kal beta son bertobat ko dudu di pinggir jalan tarus mungkin beta ju bisa kecanduan itu barang," Tobo kastao sang Bai Ndu.

Ina Feok ju bangun ko kas yakin Bai Ndu bilang dia pung laki sakarang su son mau pake it barang te taku kana tangkap.(oby lewanmeru)
 

Ikuti Berita POS-KUPANG.COM lainnya di GOOGLE NEWS