Tapaleuk : Dudu Lu'u Depan Jalan 

POS-KUPANG.COM- INA Feok su bertobat ko dia sakarang son mangomel dia pung suami lai. Tapi tao kanapa ko ini hari dia ribut matipung, sampe-sampe tetangga dong ju lari kaluar ko dengar. 

Ina Feok dong salama ini tenga di naimata sana,makanya balom ada angkot yang maso di situ.

"Ama lu itu hari beta su bilang ko katong karedit motor lu sonde mao. Sakarang lu rasa su, katong susah  bagini baru lu bingung,"

Ina Feok ada mangomel karna sakarang dia mo pi pasar cari bemo setengah mati.

Ama Tobo yang ada dudu di muka rumah bangun ko jalan pi belakang karna ada tetangga dong ju ada muncul di situ.

"Ina bakalae deng sapa, su kanapa ko pagi-pagi si baribut ini," Bai Ndu su datang di Tobo dong pung rumah.

"Ama e, katong jang omong bemo dolo, sakarang ini pemerenta ada pusing karna katong pung jalur ini balom ada bemo yang lewat," Ama Tobo kastao di Bai Ndu.

Ina Feok ada dengar jadi dia datang ko tanya Ama Tobo. "Kenapa ko katong omong motor na lu omong itu bemo pung len dong. Lu sama ke pegawe perhubungan sa," Ina Feok tamba emosi.

Bai Ndu yang su mangarti Tobo pung maksud, dia pi duduk ko omong bae-bae deng Ina Feok.

"Begini Ina lu pung laki itu omong benar, karna katong pung jalur ini belum balom ada angkot yang maso," Bai Ndu duduk pangku kaki.

"Batul su ama, ko pemerentah di kota ni su pernah omong bilang mo alihkan angkot datang sini ma balom," Ama Tobo deng Bai Ndu tamba semangat omong  ke anggota dewan sa.

"Bosong dua omong su batul, memang katong mungkin musti usul ato karmana," Ina Feok su mengerti ko dia ju semangat omong.

Dong tiga bahas soal pemerentah ini sampe siang ju balom abis. 

"Ama deng Ina, beta ni son habis pikir katong pung tampa tenga ini su rame ma balom ada bemo yang maso sini. Ke beta yang hamper tiap hari mo pi pasar ni susah," 

Ina bangun ko pi dudu lu'u di depan jalan tunggu ojek.‎(oby lewanmeru)