Motor Dapat Tarek Dari Polisi

Motor Dapat Tarek Dari Polisi

AMA Tobo pulang rumah sambil pegang helm dengan muka asam-asam. Saking marah, Ama Tobo lewat dia pung bini pung depan ju sonde togor.

Ina Feok yang lia dia pung suami pung model sonde jelas begitu, mamtua curiga pasti bapatua ada mabok berat.

"We tua sonde jelas, lu pikir yang ada di sini boneka, ko lu lewat sonde togor ame ju ni," Ina Feok mulai naik darah deng bapatua.

Dengar bapatua sonde ada respon, mamtua langsung minta dia pung uang siri pinang yang tadi pagi ada titip di bapatua.

"Tobo sayang, mana beta pung siri pinang, jadi beli kow, kalau sonde jadi na kasih kembali ko beta beli di kios sa," mamtua mulai rayu bapatua kow bisa baomong

Ama tobo yang ada duduk di teras depan sambil isap roko Saliti pun sonde komat kamit deng mamtua.

Ina Feok lia-lia dong pung motor sonde ada di depan teras, langsung mangamok bapatua, jangan sampai lu maen judi kow marah-marah sampe gade buang motor ni, makanya lu marah-marah terus.

"Maitua ew, lu bisa tenang kow, b ada pusing ni. Katong pung motor pak polisi dong ada tarek ame tadi," bapatua mulai omong

"Tadi pagi beta buru-buru mau pi jemput penumpang, pas lewat depan Polresta Kupang Kota, pak polisi dong ada operasi periksa kendaraan, makanya katong pung motor dapa tarek," ama tobo cerita lanjut kasih mamtua

Ama tobo filing sonde enak, dia pelan-pelan ame roko deng kopi langsung keluar dari teras pi di luar rumah.

"Tobo ew, kenapa itu motor bisa dapat tarek dari pak polisi dong," mamtua mulai lemas

Karena tau mamtua pasti marah besar, dia sangaja kembali mau pi palok mamtua di teras.

"Ina sayang e, tadi pagi beta buru-buru, makanya sonde lewat jalan potong, dan beta berani iko jalan besar, tau-tau dong ada operasi gabungan di sana," ama tobo jelaskan tamba kasi mamtua.

"Makanya tobo, selama ini b suruh lu buat SIM dan perbaiki itu motor bae-bae. Lu ju talalu bagaya ke ana muda kow pake itu kandarpot resing lai ni, pokoknya b sonde mau tau, lu harus bawah pulang itu motor cepat," mamtua terus serang bapatua

"Ia mama sayang, besok beta akan pi urus SIM, dan kalau motor su ame kembali beta akan ganti kandarpot asli dan pasang kaca spion dong, supaya kalo katong mau jalan na aman-aman," dia mulai goda mamtua (Ray Rebon)