Tapaleuk : Katong harus jaga Ideologi

Katong harus jaga Ideologi

MAS pagi buta,Ama Tobo su bangun ko cari mandi. Bapa tua ini pagi tahu mimpi apa ko semangat sekali mandi pagi.

Ternyata Ama Tobo ada dapat undangan iko seminar bahas masalah tenaga kerja di Pancasila

"Ama e, lu ini pagi setan apa yang nae kena lu ko mandi pagi, atau tadi malam lu mimpi bae ko," Ina Feok batareak dar dalam kamar.
Soalnya masih gelap di luar na,biasa begitu dia pung laki masih sono.

"Ina ,lu sonde tahu ko,tadi malam beta kasi tunjuk undangan mau diskusi di hotel tu, andia ko beta harus siap ko pi pagi," Ama Tobo bersiul baru jawab dia pung bini.

Ama Tobo juga senang iko diskusi karna selama ini orang ke su lupa it Pancasila. Kalo dulu Tobo dong mas EsDe sa su hafal itu Pancasila deng dia pung butir-butir dong samua.

"Katong ni musti  iko diskusi supaya mangarti apa itu ideologi karna ana-ana jakan sakarang su mulai lupa itu nilai yang ada di Pancasila," Ama Tobo su samangat lebih dari pengamat sa.

Dia ada dengar gelas su bunyi ,jadi dia semangat karna Ina Feok su bawa kopi taro di meja.

"Pi iko acara na pasang talinga bae-bae supaya pulang na jelaskan di katong pung ana dong. Kalo sonde dong tasibu ko lupa itu nilai Pancasila . Dong ju harus tao , Pancasila itu lahir di katong pung daerah," Ina datang duduk dekat dia pung laki.

"Betul Ina, itu yang beta ada samangat ko mo iko. Biar su tua tapi katong harus bisa tahu itu ideologi bangsa, supaya bisa kastao katong pung ana cucu deng keluarga samua," Ama Tobo mulai masko kopi.

Ina Feok yang dengar dia pung laki jelaskan ma dia angguk-angguk. "Batul sudah, apalagi pemerenta su tetapkan hari lahir Pancasila itu hari libur ju," Ama Tobo jelaskan tambah baru dia bangun jalan. (oby lewanmeru)