Katong Musti Dukung Penjabat Bupati

AMA  Tobo su satu minggu ini dia sonde di rumah te ada pi nonton orang karja di hutan mangrove sana. Dia deng Ina Feok ju ada dengar pemerenta ada mo bangun wisata baru.

"Ama lu kenapa pulang malam langsung tidor, jang sampe lu ada mabok laru ko," Ina Feok tanya dia pung laki.

Memang su dua hari Ama Tobo keluar dari rumah pagi-pagi pulang su malam.

 Dia biasa jalan kastao dia pung bini, ma su dua hari dia jalan sa.

 Ina Feok ju su tao bilang dong pung bupati su abis masa jabatan, jadi musti ada orang jadi penjabat bupati.

"Ama e, beta ini hari baru lia muka, ada pi mana," Bai Ndu ju su sambung dari muka Tobo dong pung muka rumah.

"Ama, lu dengar ko sonde selama dua hari berturut-turut tu beta ada bantu urus mo jemput penjabat bupati," Tobo jawab di pung bini deng Bai Ndu.

Bai Ndu yang dengar langsung diam-diam karena dia su tao kalo Tobo di sana pasti ada tasibuk ma  pasti ada minum laru baru pulang.

"Berarti ama dua hari ini sonde ojek ko beta son lia di pangkalan. Beta kira ama sonde ada tu ada pi luar daerah ko," Bai Ndu su masok ko duduk di dalam Tobo dong dalam rumah.

"Tao ama e, te ini su satu minggu dia bajalan pulang tenga malam. Beta ju son tanya," Ina Feok geleng-geleng kepala.

Ama Tobo kemarin pulang ada beli sayur kankung satu ikat sa ko dong su makan kas habis. 

Ini hari Tobo son keluar bajalan, jadi di rumah dong masi makan kosong sa.

"Beta heran lu bilang pi ojek ma andia pulang ju son bawa apa-apa," Ina Feok pung darah su naek.

Ina Feok su tao kalo dia pung lagi pulang son bawa apa-apa berarti uang itu su pake pi pak laru.

"Ina e, jang sampe Ama Tobo pung motor ada onar jadi karmna na tanya bae-bae dolo," Bai Ndu sambung Ina Feok.

Bai Ndu deng Tobo ini su biasa sakongkol kalo ada dapat rezeki dong dua minum sama-sama na. 

Ama Tobo yang masih tenang dia senang karna Bai Ndu su bela sama dia. Tobo ju sangaja maen mata deng Bai Ndu.

"Beta ini mo kastao sang bosong samua ,sakarang ini katong pung bupati su barenti karna su abis waktu tugas. Beta dengar katong pung penjabat bupati itu su pengalaman di birokrat sana, jadi beta hanya pasan sa ko katong samua musti dukung," Tobo mulai kasi penjelasan. (oby lewanmeru)