Mujizat

BAI Ndu sore-sore su bastel rapi mati sa. Isi dalam na. Sapatu yang su badaki kiri kanan bapatua sikat kas barisi. Samer sonde ada bapatua kas basa kaen lap baru kas mangkilat sapatu.

Ina Feok hanya badiri ko geleng-geleng kapala. Maitua liat ma beking ke malas tau sa. Ma'ale sirih pinang ais iris kangkung tarus. Ina Feok su tau na. Pasti Bai Ndu mau pi lapangan Polda sana ko iko KKR na.

Bai Ndu memang Ina Feok sonde bisa togor lai. Sopi, laru deng tembako sek sonde bisa lepas na. Pas ada KKR, Ina Feok ada bacarita deng Mia di rumah sebelah sonde tau Bai Ndu ju dengar. Karmana ko Bai Ndu sonde kapingin mau pi? Orang sonde bisa bajalan bertaon-tao sa langsung bangun bajalan na. Bai Ndu rasa ju su cape, tiap hari bakalai dengan Ina Feok. Andia ko baitua mau pi iko. Sapa tau dia pung kebiasaan minum sopi deng laru bisa barenti.

"Ina beta jalan do." Bai Ndu balom togor abis mau jalan Ina Feok su potong. "Ama duduk do. Beta mau omong sadiki."

Tau Ina Feok pung gaya to. Mamtua kesempatan na. Ko ais Bai Ndu su pegang alkitab bagitu sonde mungkin mangamok lai. "Ama su batul ni ko? Ama sadar ko. Beta hanya tanya sa, te itu KKR bukan untuk coba-coba. Harus benar-benar siap hati dan mau bertobat untuk terima Yesus di kitong pung hati. Kalo Ama mau pi coba-coba sa ato iko rame, jang harap mau jadi bae."

"Ko Ina ni. Lu sonde bisa diam ko? Beta su siap mau pi baru lu macam-macam lae. Lu kalo sonde iko, duduk diam-diam di rumah, doa kas beta deng orang-orang yang pi sana biar ko sakit panyakit dong sembuh to. Ina tau to. Beta kalo su bagini sonde maen-maen na."

Ina Feok liat Bai Ndu pung kandok sa dari jaoh. Mamtua urut dia pung dada. "Tete Manis ee..! Jaga beta pung sayang. Kalo memang dia mau tobat, bae su. Tete Manis ator sang dia bae-bae ee..! Jaga supaya itu pandeta, panitia dong deng semua orang yang iko KKR di sana, sampe abis sonde sakit apa-apa. Beta tau Tete Manis sonde pernah lupa kitong na..! (sipri seko)