Daging Babi

AMA Tobo paling hobi makan budik. Perut babi yang dong isi deng darah, ais itu campur deng bumbu dong. Goreng kering campur deng tomat ais kurus, makan sonde tau kinyang na. Minyak malele iko bibir dong sonde rasa.

"Dia pung nikmat tu di situ. Sonde ada minyak, sonde lengkap. Baminyak tu yang enak. Makanya bosong jang taro tomat talalu banyak, supaya dia pung minyak agak kantal sadiki."

Ama Tobo dudu deng Ina Feok di rebis rumah. Ama Tobo baru ais makan ko dudu talepo sonde tau diri. Mata su kici ana sa. Mah su nae di mata na. Ais makan dua piring, Ama Tobo dudu sonde pake baju. Karingat turun dari atas, malele iko parut yang su bulat sa ke bola.

"Lu makan tarus bapa. Lu tau ko sonde. Sakarang ni su mulai panyaki babi. Orang su taku makan na. Lu cek tarus te pikir ada bae na," Ina Feok togor sang Ama Tobo.

"Ina e. Lu diam kanapa. Dari nene moyang, sonde perna beta dengar ada yang mati karna makan daging babi. Yang ada cuman balasa ko ceke son bae punya, akhirnya munta kalo sonde mencret kas kaluar. Lu jang beken ane-ane."

"Itu orang dong yang sembarang. Sakarang ni jual beli babi ada lagi bae na. Orang su jengkel tu, makanya beken ane-ane. Sonde usa taku. Lu tutup bae-bae itu budik ko sadiki lai beta makan. Sonde tutup ko kucing makan kas abis baru bosong liat." **