Tapaleuk: Sayur Darurat Akhir Bulan

POS-KUPANG.COM, KUPANG - Su jam sembilan pagi, Ama Tobo su tarlalu lapar tapi pas buka tutup meja makan yang ada hanya marungga kuah bening.

Pas buka magicom, nasi ju balom masak karna Ina Feok balom pulang dari kantor lurah pi ikot rapat RT se-kelurahan.

Pengaruh lapar pung karja, Ama Tobo makan kosong itu marungga bening sampe bokor mangkilat.

Baca juga: Tapaleuk: Alasan Sonde Mau Pake Helm

Pas Ina Feok pulang sampe rumah baru mau masak nasi, dia liat marungga di atas meja su sonde ada lai.

"Tadi ada marungga bening su ada di atas meja, tapi in su sonde ada lai, Ama su makaun kas abis ko? ina Feok tanya deng heran dia pung laki.

"Iya tadi beta su makan kas barsih, pangaruh Ina balom masak na, tapi bisa ko besok tausah marungga lai, ganti sayur apa ko," Ama Tobo jawab deng mangomel.

"Nah.. ama son tau ko? Marungga tuh program pak Gub, manfaat banyak, terutama untuk kesehatan, makanya pemerintah imbau masyarakat untuk konsumsi marungga," Ina Feok jawab deng senyum manis.

"Iya.. program pamarintah ju bukan berarti di atas meja hanya marungga kosong sa, tingkah ke macam kondisi darurat akhir bulan sa, nanti katong lama-lama sama ke ternak dong makan marungga," Ama mangomel tarus dia pung bini.

Baca juga: Tapaleuk: Bikin Berita Dalam Berita

"Ama sayang, kalo sonde mau makan marungga na jang mangomel banyak, kas doi ko beta balanja sayur deng lauk dong supaya makan enak sadikit," ina Feok kakodok sampe malerok dia pung laki ada dudu malas tau sambil baca koran. (Christin Malehere)

Berita Kota Kupang Lainnya