Tapaleuk: Bikin Berita Dalam Berita

Tapaleuk: Bikin Berita Dalam Berita

POS-KUPANG.COM, KUPANG - Ini hari Ama Tobo Mau banting stir coba jadi wartawan. Dar tadi malam dia su kontak-kontak sang dia pung kawan masa SD dulu yang su jadi wartawan.

Baptua kastau dia pung mautua Ina Feok, "mama kira-kira kalo beta jadi wartawan cocok ko sonde," mamtua katawa sambar sang bapatua.

"Bapa ee tadi malam mimpi apa, kalo sonde ada kerja na dudu diam-diam lu pikir itu ke lu pi tipu-tipu san Bai Ndu tiap sore deng lu pung lidah bercabang tu," Ina Feok manyaot sambil tarek napas emosi.

"Ko beta mau jadi wartawan na salah ko Ina Boi e, ko beta pung kawan bilang yang penting tau baca tulis terus pi sorong Hp sa su modal, paling-paling pulang dapa doi, apa lai beta lidah bacabang bagini bet feo ame sang narasumber dong, beta mulu minyak lae katong bisa dapat doi banyak sayang e," Ama Tobo jelaskan kas Ina Feok.

Baca juga: Rektor Unwira Kupang Resmikan Galeri Investasi Digital

Baptua jawab su sebut-sebut doi bagitu Ina Feok mata terang telinga badiri, deng penuh semangat dia suru dia oung laki ko siap ganteng-ganteng ko pi kerja jadi wartawan.

Pas sampe depan gang bagini Ama Tobo katumu Bai Ndu, "We lu mau kerja dimana ni ko su stel rapih bagini, mau pi mulu minyak sapa lae," Bai Ndu tanya ma ada pegang-pegang Ama Tobo pung pakian.

"Beta mau pi jadi wartawan, tadi malam beta pung kawan yang su jadi wartawan ajak beta ko iko dia, dia bilang tiap hari dapa doi trus, apalai dia tau beta mulu enak bagini," Ama Tobo manyaot pukul dada.

Bai Ndu tertawa pegang parut sampe merayap, "lu pung ijazah hanya sampe batas S tingkat 2 alias SMP ma lu mau jadi wartawan, jang sampe lu tulis berita dalam berita alias hoax itu orang cari lu papoko stenga hek, wartawan tu orang yang sakola sampe S2 ko S3 sa tulis berita ju kadang masih ngao-ngao ma model ke lu ini itu pejabat dong tendang kas keluar lu dr pintu," Bai Ndu jawab ame ni Ama Tobo lansung tahedek ko lansu pulang rumah darpada kena tendang. (Ryan Tapehen)