Tapaleuk: Alasan Sonde Mau Pake Helm

POS-KUPANG.COM, KUPANG - Masih pagi bagini Ama Tobo deng Bai Ndu su duduk nongkrong di depan teras rumah.

Di atas meja su ada kopi panas du gelas deng pisang goreng satu piring yang angkat dari tacu.

Karna pisang goreng masih panas, jadi Ina Feok ju siap kas dong dua  garpu biar sonde pegang langsung deng tangan.

Dong dua baomong sarius tentang Kapolresta Kasih hadiah di Anak Keci yang pake helm saat naik sepeda motor trus dapat hadiah.

Baca juga: Gelombang Tinggi Landa Sejumlah Wilayah di NTT Dua Hari Kedepan

"Beta salut deng itu ana kici, su mulai pake helm saat naik motor, apale dia pung mama bilang itu ana menangis kalo naik motor son pake helm," Bai Ndu omong sambil gigit pisang goreng pung garing.

"Andia tuh, pake helm ni sebenarnya kewajiban karna pesan kapolres tuh manfaat pake helm untuk kas kurang resiko saat ada apa-apa di jalan," Ama Tobo sambung sambil pegang gelas ko tiup kopi yang masih panas.

"Batul sekali Ama, itu helm tarlalu penting untuk lindungi katong pung kapala te kalo kena bentur di aspal ni sonde bisa beli atau tukar tambah, karna sonde ada toko yang jual," Bai Ndu manyaot deng gigit kas abis pisang goreng yang tatusuk di garpu.

"Itu su Bai Ndu, beta kalo bagonceng deng Ina Feok pake motor selalu kas ingat supaya pake helm, tapi mamtua pung alasan ni macam-macam, pokoknya cari cara biar sonde pake helm," Ama Tobo omong suara tinggi baru tapi sonde sadar kalo Ina Feok yang ada bawa piring isi pisang goreng yang masih panas.

Baca juga: UPDATE Perang Rusia Ukraina, Kawalahan Tahan Serangan Rusia, Ukraina Akui Butuh Senjata Anti-Rudal

"Memang Ina pung alasan apa ko sonde mau pake helm," Bai Ndu sangaja tanya kas panas sambil mata ada liat Ina Feok yang su badiri cakak pinggang dan pasang talinga di Ama Tobo pung balakang.

"Ina tarlalu banyak alasan sonde mau pake helm, bilang dekat rumah na, hari libur, tanggal merah, sonde ada polisi yang jaga, apale kalo mau pi pesta, mamtua sonde akan mau pake helm karna takut sanggul rambut rusak, baru alasa bilang cantik hilang kalo pake helm," Ama Tobo omong sonde ada beban tapi balom sadar kalo mamatua ada pasang talinga dengar Ama pung omongan.

"Tadi ama bilang beta apa tadi, beta kurang dengar, omong ulang do biar beta dengar jelas,"  Ina Feok yang su jengkel karna tahan emosi langsung pegang cubit Ama Tobo pung daun talinga sampe bamerah.

Baca juga: Luna Maya Beri Gombalan ke Siwon, Balasan Mantan Ariel Noah ini Malah Bikin Salting

"Ampun... Ina salah dengar, yang beta omong tuh bukan Ina tapi ada beta pung langganan ojek yang sonde mau pake helm padahal sakarang ni polisi ada rajin tilang pagi, siang, sore, malam," Ama Tobo minta ampun sambil cari cara untuk bela diri.

Bai Ndu yang rasa lucu langsung katawa puas trus omong : "urusan rumah tangga jang sampe orang luar tau,"

Bai Ndu minum kopi kas abis langsung pamit pulang sambil bawa satu piring pisang goreng yang masih utuh. (Christin Malehere)

Berita Kota Kupang Hari Ini