Setan Ada Noki-noki

AMA Tobo dudu ko hela napas panjang. Urus Paskah ni, baitua sonde bisa hela napas sadiki. Kalo bukan di gareja, baitua pasti di lapangan. Beken acara macam-macam supaya beken rame paskah.

Laru, baitua sonde sonto memang. Bai Ndu bawa dia pung setan datang ko noki-noki sang Ama Tobo, ma baitua sonde memang. "Hari bae bagini jang beken rusak diri."

Bai Ndu mau katawa ju taku Ama Tobo marah. Mau bilang halaik, Bai Ndu ada agama. Mau bilang orang bae, Bai Ndu sonde perna gareja. Ma andia, baitua sonde perna beken onar. Paling mabok laru sadiki, baitua bacarewet deng Ama Tobo, ais itu nae ko tidor.

Ini hari Bai Ndu mungkin mau tes Ama Tobo lai. Baitua hela karosi ko dudu deka Ama Tobo. Bai Ndu sonde nodek Ama Tobo memang. Ame mok ko po'a laru, Bai Ndu masko sampe abis. Ais itu pake jari ko korek lawar ikan sardin baru makan. Ama Tobo su mau mati sa. Badan gamatar liat Bai Ndu.

"Nyadu jang bagitu. Kitong baru abis paskah bagini, nyadu datang bawa setan ni kermana. Nyadu sonde bole minum sandiri bagitu."

Omong abis, Ama Tobo bagun ko pi dudu di Bai Ndu pung rebis. Bai Ndu katawa sampe raroso di tana. "Lu cape urus kiri kanan, Bu dapa apa. Kalo paskah abis, foe ulang bagini, na sama sa de." Ama Tobo sonde toe memang deng Bai Ndu. Baitua masko laru sampe dua mok baru barenti. *