Ame Doe Kolekte

BAI Ndu ini pagi singga ame Ama Tobo ko pi gareja. Dong dua dudu paling muka. Doa, manyanyi, pandeta pung hotbah, dong dua iko sampe abis. Kalo biasa iko rapat di kantor desa, mangantok, ini kali Bai Ndu deng Ama Tobo mata tarang ke neon saratus wot.

Pas penatua deng diaken kas jalan tangguk mau kolekte, Ama Tobo korek sang Bai Ndu. Pas Bai Ndu liat, Ama Tobo rong doe saratus ribu merah. Bai Ndu pikir Ama Tobo pasti malu taro, jadi suruh dia yang kas masok di tangguk.

Ais gareja, dong dua jalan pulang. Bai Ndu sonde abis pikir yang Ama Tobo kolekte pake saratus ribu. Biasa paling tinggi 500 nekel. "Beta akui nyadu. Itu doe perpuluhan tu ko? Saratus ribu memang na. Beta umur-umur baru liat orang kolekte bagitu besar."

Ama Tobo sante sa. Baitua jalan tarus. Bai Ndu sonde sabar ko seti sang Ama Tobo. "Nyadu jang seti beta. Beta tu tadi sebenarnya kolekte hanya pake doe nekel sa."

Bai Ndu takuju. "Ais doe saratus ribu yang nyadu kas beta tadi? Nyadu jang merendah di atas gunung bagitu. Beta jadi sonde enak."

Ama Tobo senyum tipis ko malerok sang Bai Ndu. "Itu doe tadi tu bukan beta punya. Doe tadi tu, pas kitong mau maso di gareja, jato dari nyadu pung saku. Andia ko beta ame ko sorong, nyadu malah kas masok di tangguk. Beta yang ada heran, ko nyadu kolekte bagitu besar."

Bai Ndu su mo mati sa. Ternyata itu doe sial. Su sembunyi dari maitua, Ama Tobo yang dapa pili. Rencana ais gareja ko pi maen kartu, su sonde jadi lai. **