Balajar Itong

Pak guru pukul testa. Ama Tobo ternyata tau itong karena tiap hari urus maen kartu sa na.

PEMERINTAH sekarang benar-benar perhatikan rakyat dong. Semua mus sejahtera. Yang sonde sekolah, dong kas skolah fare. Yang tua, tapi masih buta huruf, iko sakolah paket.

Ama Tobo ju termasuk salah satu. Baitua termasuk siswa yang pintar. Dia pung guru tiap hari maen puji sang baitua. Laru su sonde minum lai. Baitua su mulai eja-eja na.

Ini hari pelajaran berhitung. Pak guru tanya, sapa yang tau itong, Ama Tobo angka tangan. Baitua pikir, ko satu sampe sapuluh sa ju. Cete cete sa. "Batul lu bisa itong ko?" Ama Tobo ango kapala.

"Kitong mulai! Ais tiga barapa." "Ampat." Guru balom omong abis, Ama Tobo su sambung. Itong sampe sapuluh, Ama Tobo omong ke aer. "Setelah sambilan, barapa." Gampang sa Pak. Sapuluh to."

Pak guru su gigi asam deng Ama Tobo. Tua satu tu, pintar e. Baitua pikir, setelah angka sapuluh, pasti Ama Tobo su sonde tau lai. "Ama Tobo. Kalo bagitu, setelah sapuluh barapa."

Ama Tobo kata baru jawab. "Pak e. Kalo itu dong beta sonde akan salah. Beta tiap malam, maen itu angka dong sampe pagi na. Ais sapuluh, jek, kuin, king deng as to. Pak pikir beta sonde tau na."

Pak guru pukul testa. Ama Tobo ternyata tau itong karena tiap hari urus maen kartu sa na. **

Penulis: PosKupang
Editor: Sipri Seko
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved