HBD Bukan RIP

INA Feok pung maen fesbuk ni sonde bisa togor lai. Hari-hari HP di tangan sa. Pi kakus ju, mamtua pegang na. Andia ko maitua paling setres kalo listrik maen mati-mati.

Mamtua sonde perna beken status. Paling pasang foto ada bajual di pasar ato pi timba aer. Gaya foto sama sa. Pasti leher miring pi kiri na. Tiap hari pasti mamtua komentar orang pung status, kalo sonde tendes tanda jempol. Mamtua jadi idola na. Parte dong talalu banyak yang suka deng mamtua.

Amper siang bangun, mamtua pasti su buka HP. Su abis jempol orang pung status dong, mamtua maloe sapa yang ulang taon. Sonde kenal ju, mamtua kasi ucapan na. Sonde tau HBD itu arti apa, mamtua pung kata itu sa na.

Satu pagi mamtua mo tulis ucapan. Mungkin karna masih mangantok karna tadi malam mete orang mati, mamtua mau tulis HBD, salah ketik ko tulis RIP. Baru yang dia kasi ucapan, dia pung parte Ina Kale. Ina Kale ju buta huruf, jadi mamtua senang sa. Mamtua cepat-cepat balas Ina Feok pung ucapan, makasi oooo!

Pas bakatumu di pasar, dong dua bapalok ko ciom idong. Ina Kale senang mati, Ina Feok kas ucapan pake bahasa Inggris. "Makasi nyadu. Su kasih ucapan RIP buat beta. Malam kalu ada waktu na pi rumah. Baitua ada suruh ko rubus Nelis pung ayam tenak satu." **