Walikota Tetangga

DUNIA malam su rame. Dunia maya ju sonde mo kalah. Perang kata-kata deng perang program. Bukan pi cari muka sa, ada yang su barani pasang dia pung program di dunia malam deng dunia maya.

Su sonde pake malu lai. Samua omong mau maju jadi walikota. Ama Tobo sonde bisa iko. Baitua pengaruh di lingkungan, ma sonde ada ijasah. Baitua lulus sakola minggu sa na. Ais, itu ju suksesi di walikota tetangga na, jadi baitua sonde mo repot.

Ma andia, ini orang dong pung bajual diri, beken Ama Tobo hanya dudu ko goyang-goyang kapala. "Belom mulai ni. Masih lama ang. Te ini orang kota oo, beda kalo di kampung. Beta kas contoh walikota Naikolan sa. Sapa datang baitua terima pake oko mama na. Natoni lai. Artinya, bosong liat orang banyak, jang bilang dia ada suka deng bosong."

Bai Ndu diam sa. Baitua ju mengaku tim sukses na. Padahal itu calon sonde kanal dia. Ma andia, baitua pi tasoso tarus. Calon goyang sadiki pi mana, baitua langsung lempar pi fesbuk. Lawan tasala sadiki, baitua kosi kas masok pake nama laen. Olok sampe nenek moyang dong iko kaluar.

"Sakarang dong mulai kuliling su. Maso kampung kaluar kampung. Datang bawa doe bae. Datang hanya maloe ais lewat tu. Co barani na datang bawa doe pribadi ko sorong janda balu dong yang makan tar ada tu. Ontong sa itu di tetangga. Kalo di kitong sa, baomong dolo ang." **