Lu Mau Bakalai Ko
Lu kici ana sa ma foe mo mati. Lu mo bakalai ko. Beta putar lu pung kapala nanti ke peong.
AMA Tobo amper toki dia pung cucu dua orang yang maen kaneker di deka dadegu. Cucu yang besar tau itu satu kuti karmana ko tapontas kana yang tatoneng di atas batu. Cucu yang kici sonde mau na.
"Ko tadi lu sonde bilang pontas na. Lu sonde bilang tarket ju. Lu hanya kuti sa na. Beta sonde mau na. Su bae ko be kas tatoneng keneker to. Beta sonde mau na."
Cucu yang besar ju sonde onslak. Dia minta yang kici mus bayar na. Muntar to, jadi mus bayar. Batolak bahela, sonde ada yang mo kalah. Cucu yang besar su nae darah. "Lu kici ana sa ma foe mo mati. Lu mo bakalai ko. Beta putar lu pung kapala nanti ke peong."
Ama Tobo terpaksa turun tangan. "Bosong ni apa hang. Sapa yang jago di sini. Adik kaka ju mus bakalai. Bosong kira maen kaneker tu politik ko andia kaka ade ju mau bafiruk. Barenti su te nanti beta habok sang bosong dua."
Cucu dua orang diam sa. Dong dua sonde jadi bakalai lai. Cucu yang besar palok dia pung ade kici ko jalan. Dong dua su lari ko kejar layang-layang ada nao di atas pohon. Dong dua lu'u sa di bawa pohon ko tunggu layang-layang jato.
Ais ame itu layang-layang, cucu yang kici masih ingat Ama Tobo pung bahasa tadi na. "Bai tadi omong politik ko. Politik tu apa e. Kanapa ko bilang ade kaka ju barufuk.? Kitong sonde to."
"Beta su tau. Mungkin bai talalu banya iko kompanye na. Ma tadi di sakolah pak guru omong na. Dia bilang kitong di Indonesia tu ada Bhineka Tunggal Ika. Dia pung arti beta sonde tau. Tapi bilang kalo dia pung bahasa Inggris tu artinya Taim Is Mone."
Cucu yang kici sanang mati. Dia su tau na. Bhineka Tunggal Ika pung bahasa Inggris, Taim Is Mone. **
