Bakalai

AMA Tobo manyasal mati pung waktu pulang nonton sepak bola dari stadion Oepoi. Ko karmana tar manyasal, bapatua sangka bisa dapa nonton orang barmaen bola deng bagus, eh tarnyata dapa nonton orang bakalai.

"Beta tau bagitu,beta sonde pi nonton. Su cape-cape pi sana siang-siang, tar tidor siang, pake bayar lai, hanya dapa nonton prang bakalai," Ama Tobo dudu di rebis sambil kipas-kipas dia pung badan pake koran karna bakaringat.

Ina Feok dapa dengar Ama Tobo pung mangomek, langsung pica katawa. "Sapa suru pi sana. Bukan di ruma ko kas barisi kintal karna sakarang su musim bagini, ma pi pasmen di lapangan. Untung ko, tar ada yang bakalai, nae kana deng lu."

Ina Feok kalo su bagitu, komentar tar abis-abis. "Ini su, orang dong barmaen tu bukan mo maen yang bagus, yang panting dong manang, biar pake cara apa ju, sonde panting."

Ama Tobo yang dengar dia pung bini pung baomong langsung manyao. "We, lu kalo tar tau hal, na  jang batamba. Beta kira ini karna panitia kurang cermat. Mana ko kasi hakim garis asal sama deng tim yang barmaen. Yang namanya rasa kedaerahan tu pasti ada," Ama Tobo taceke karna dia pung bini pung komentar.

Ina Feok tar mau tau. "Ini su, kotong ni musti lati kotong pung sportivitas. Jang hanya mo menang sa. Biar kala, yang panting kala terhormat. Jang ko menang ma karna curang. Kotong ni dukung itu El Tari Memorial Cup, tapi yang paling penting adalah barmaen deng bagus. Kapan kotong pung sepak bola bisa maju, kalo bagini tarus."

Ina Feok jalan kas tenga dia pung laki, Ama Tobo yang masih  dudu kakodok di rebis ruma. (hermina pello)