POS KUPANG.COM, SU dua minggu lebe ni Ama Tobo son mo omong banya. Baptua cuma sibuk urus dia pung laru sa. Kalo laru su abis, baitua ame jergen ko pi cuci. Abis cuci itu jergen, paitua po’a kambali laru di itu jergen abis tutup trus pi susun di muka.

Kalo ada lebe, baitua ju son tasibuk panggel dia pung kawan ko tap sam-sama. Laklaki hopo sandiri itu laru. “Kalo mabok ju mabok di beta pung ruma. Sapa yang larang? Paleng bini sa yang togor,” laklaki omong sandiri, sama ke orang su senu.

Mangkali dengar dia pung laki omong sandiri, Ina Feok yang ada bamasak ju datang maloi. “Bapa e, lu omong deng sapa? Jang sampe lu su mengong ni,” maitua tapa sa.

“Sonde mama. Darpada beta omong trus lu mara-mara, lebe bae beta omong sandiri,” baitua jawab sambel katawa.
Abis omong bagitu, laklaki sambong lai. “Bagini mama. Beta ni son abis pikir, kanapa e sakarang ni orang gampang skali baku curiga tu. Satu curiga satu. Staf curiga dia pung bos, dia pung bos curiga dia pung kawan, trus orang laen curiga lai itu bos pung kawan. Kalo bos deng bos su su bacuriga model bagini, trus kotong karmana? Itu yang beta son abis pikir ni,” laklaki omong deng dia pung testa su tagulung sama ke orang gulung tikar tu.

Maitua yang ada bamasak ju dengar sambil lalu sa. Abis itu jawab deng mulut panjang. “Ko bapa pung tasibuk lai. Orang pung urusan ko bapa yang pikir. Itu namanya son ada karja bapa car karja,” maitua tapa deng dia pung bahasa.
“Darpada bapa pikir ane-ane, lebe bae sini bantu beta bamasak. Supaya lu tau, dimana-mana ni orang jadi kaya karna karja iko hobi. Na, bapa kan hobi masak. Kalo dapa modal, trus kotong buka warung kan  enak? Warung maju, laru abis, kotong jadi kaya. Makanya, sini bantu beta, nanti baru beta servis,” maitua omong sambel maen mata, tau dia pung maksud apa. Liat bagitu, baitua son kas tenga. Langsung pi tempel di dapur situ. Ko Ama Tobo na, lu mo lawan?