POS-KUPANG.COM, ITU sore, Ba’i Ndu geleng-geleng kepala waktu baca koran yang ada tulis bilang doi yang itu bos kasi tu ada masalah. Biar baca sambel geleng-geleng kapala ju laklaki lanjut trus.Abis itu laklaki buka lai itu koran ko liat halaman olahraga. Mangkali pas di dia pung hati, Ba’i Ndu angguk-angguk.

“Bu ni kanapa? Tadi dar jauh beta liat bu geleng-geleng kapala. Pas beta datang dekat, bu su angguk-angguk. Memangnya kanapa? Ada barita apa?” Ama Tobo tanya Ba’i Ndu yang masi sarius baca itu koran. Mangkali talalu sarius, andia laklaki kaget waktu liat Ama Tobo su di muka situ.

“Andia ni, orang dong bilang beasiswa ko apa ko, katanya ada masala andia beta ju bingung ni. Beta son mangarti dia pung masalah na. Coba coba beta pung cucu ju dapat ini barang ni bae hang, paleng kurang su bisa bantu beli buku pinsil dong,” Ba’i Ndu omong trus lipat itu koran ko taro di dia pung rebis.

“Trus kalo yang bu anggok-anggok kapala tadi tu kanapa lai?” Ama Tobo masi panasaran andia tanya ulang tanya di dia pung sobat. Sambel tanya, laklaki pung mata kasi tanda ko kas kaluar laru su.

“Ooo, kalo itu na beta baca piala eropa bu.. Dong pung maen talalu hebat. Makanya seluru dunia skarang ni son tidor ko nonton sang dong barmaen,” Ba’i Ndu tarangkan lai.

Abis itu, Ama Tobo omong sama ke kasi nasehat.
“Nonton bole nonton ma jang  lupa tidor. Kalo su tidor, jang pikir lai itu beasiswa ko apa pung barang. Son dapa ju son apa-apa, ko itu tu dong pung barang. Kotong yang susa ni biar nikmati sa. Kalo itu doi tu dong kasi, ya sukur. Kalo son kasi ju jang talalu tuntut, jang talalu harap.”