Iko Tender

POS-KUPANG.COM, AMA Tobo ada sarius cari dia  pung surat izin perusahaan dong ko mo iko tender. Baptua su pusing kaliling, tartau dia sese itu surat dong di map yang mana. Bapatua su babongkar semua lamari sampe bakaringat ju sonde dapa lia itu surat dong.

Liat dia pung laki ada sibuk bagitu, Ama Tobo pung bini Ina Feok langsung dudu di bapatua pung rebis ko tanya bae-bae deng dia pung baitua.
“Ama cari apa ni? Ko beta lia ama su babongkar itu lemari dong samua na. Bongkar ju bae, ma ator kambali ju bae-bae, te beta yang stenga mati,” Ina Feok tanya deng dia pung laki abis itu kastau bilang kopi deng kokis solo su ada di meja.

Dengar dia pung bini pung suara, Ama Tobo langsung bale muka ko bacarita deng dia pung bini. “Bagini mama, kalo ada itu surat ne be mo iko tender,” laklaki omong sarius mati pung andia bekin dia pung bini pica katawa.
“Awi ama e. Jang talalu tasibu deng iko paroyek do. Lebe bae kotong bekin usaha laen sa. Daripada bekin kapala pusing,”

Ama Tobo yang su cape bacari itu dokumen dong, langsung kakodok memang dengar dia pung bini omong itu.
Baitua ju  langsung masparak dia pung bini. “Lu kalo son mo bantu na kas tau, jang katawa deng beta e. Jang maen sindir-sindir te yang beta bekin ni buat kotong pung kepentingan ju,”
baitua jengkel.

Dengar bagitu, maitua ju jawab deng sante. Maitua son mau jadi kompor ko bekin dia pung dara tinggi. “Sonde ama, beta bukan katawa sang ama. Beta cuma pikir sa, bisa ko sonde dapa itu proyek. Te sakarang ni kalo son kuat kasi doi na kotong bisa gigit jari,” maitua omong plan-plan.

“Coba lia di TeTeU sana. Ada anggota dewan yang iko maen paroyek. Na kotong yang sonde ada apa-apa ni mo manang karmana? Lebe bae ta’usa bekin cape diri,” Ina Feok kasi jalas sang Ama Tobo ko laklaki langsung diam.