Ta’ Usa Pake Lai

POS-KUPANG.COM, KUPANG -- INA Feok bar pulang dar pasar. Bagitu sampe di ruma, maitua langsung kana sambar dar dia pung laki, Ama Tobo yang omong sonde jalas ujung pohn.

Tau laki- laki kanapa ko baomong sandri di teras situ.  Dia sama ke son mo tau kalo dia pung bini tu ada cape pikol barang-barang pulang dar pasar.

Dia pung bini yang son ada sangkut paut ju laklaki semprot sa iko mau. “Dulu dong bekin gong balajar. Ma hasil  ujian ju para-para pung. Jang sampe karna su para, andia dong bekin baru lai, namanya gendang belajar. Kalo model bagini, lebe bae ta’usa pake gong gendang lai. Iko lurus-lurus sa,” laklaki su boto-boto. Babtua ke orang bar lapis laru 2 jargen ko baomong sonde abis- abis.

Dengar Tobo bagitu, mamtua langsung maso trus ma ada malerok Tobo sa. Belum sampe ruang tengah Mamtua langsung bilang, “ Tobo baurus apa lai deng tu gong ko bel ko sarine, “ lu urus sa lu pung diri te itu barang dong biar pemerinat yang urus. Wi mangkali laki- laki panas dia bangun ijko dia p[ung bini dar balakang. “ Hi mama kalo tu baomomg jang asal bunyi sa. Beta jengkel karena pemerinta dong terapkan gong balajar baru sonde ada pung manfaat apa- apa untuk ini hasil ujian kamarin. Dong panas- panas ta”i ayam sa tu. Mangkali sonde ada program lai makanya buat asal- asal biar katong masyarakat tau dong ada karja, “ alki- laki tarngkan dia pung bini.

Feok ju mangkali su pamalas koTobo maen omong gong balajar ma Tobo sa dulu sonde sakolah. Jadi mamtua sambong Tobo pung omong, “ biar to bapa. Mau ada program ko sonde yang panting su canangkan. Mau jadi karaman asal orang su tahu jam bagini harus balajar. Kalo bapa masih baribut deng itu gong nah bapa pi minta ganti pemerinta sa jadi bel gareja, “ Ina feok ais omong bagini langsung manju dapur. Tobo sonde tau mau omong deng sapa lai jadi bapatua hany kas idop tivi ko nonton.