Son Masala

MAS pag-pagi buta, Ama Tobo su batasibuk di balakang ruma. Baitua timba aer ais tu kas manyala api di ra’o, trus basapu kaliling ruma.
Baptua samangat ampat lima. Andia dia pung bini yang masi tidor pelok bantal ju takuju su bangun. Maitua heran-heran liat dia pung laki batasibuk sana sini, padhal mathari belom nae.

“Su bagatal apa macam ko tasibuk pag-pagi buta bagini ni? Jang sangaja ame hati ko beta teken lu pung parmintaan. Supaya lu tau, beta son akan tanda tangan. Biar malekat datang bujuk be son mau.”

Ama Tobo pung bini Ina Feok mulai curiga harbabiruk. Ko su satu minggu ni baitua maen bagepe trus deng orang pung ana parampuan na, makanya maitua camburu ko omong iko mau.

“Adooo, pag-pagi bukannya bersukur karna beta su basapu kaliling ruma na, mangomel. Model bagini ni kotong pung rejeki jao,” baptua omong ma dia tangan batasibuk kas maso kayu di dalam ra’o.

“Mama ingat ko sonde? Ini hari kan kotong pili kotong pung kapala desa. Makanya, kotong musti siap memang. Kalo beta yang tapili kan mama ju sanang. Batul ko sonde?” baitua omong sambel maen mata.

“Mo menang ko kala ko, bukan beta pung urusan. Yang beta urus tu cuma lu pung sifat sa. Laki macam apa ko ada bini di ruma ma mas bagatal di luar. Bukan apa-apa ma beta son mau kalo lu jadi kapala desa. Mo do’i pake linggis ju beta son mau. Bekin diri sama ke hebat-hebat sa,” maitua omong son tau abis-abis.

“Bagini mama. Beta pribadi son suka deng ini jabatan. Tapi kalo orang dong parcaya karmana? Makanya kotong musti siap. Kala menang son masala. Kalo kala, ya son apa-apa. Ma kalo menang, itu karja barat,” laklaki omong sama ke su tapili.

“Kalo kala beta dukung be pung lawan yang su tarpili. Ma kalo manang, beta harus bekin yang paleng bae, supaya orang dong tau, kalo beta tulus bangun ini kampong. Jujur sa, kalo Tete Manis kas izin, be pung separo gaji ongkos ana-ana pi skola,” baptua omong besar.

“Dengar bagitu, maitua langsung mangomel. Papa, omong tu jaga badan sadiki. Jang sampe mulut omong laen, tangan pegang laen, kaki ga’e laen. Itu yang papa musti jaga,” maitua togor dia pung laki.