Son Ada Guna

HUUUUUH, cape eeeee. Lutut dong asam smua. “Papaaaa, papaaa, urut ame be pung kaki dooo,” Ina Feok pange dia pung laki, Ama Tobo yang ada dudu di bawa pohn.

“Papa e mari su. Be talalu cape ni. Urut son lama ju bae,” maitua bujuk dia pung laki.
“Kalo urut lama bisa ko sonde?” baptua mulai pancing dia pung bini.

Iiiiih, omong apa ni. Beta cape batul papa. Neu, kalo bapa urut su bae baru beta kasi hadiah. Pokonya hadia enak pung,” maitua su marengek.
Kasian liat dia pung bini, baptua ju jato hati. Ma pas mo bangun jalan, baptua kas abis dulu laru yang masi ada sisa di mok. “Lu ni, mo urut orang pung kaki ju mus tap laru. Itu laru tu obat ko?” maitua omong ma ada katawa.

Takuju, Sulabei pange dar muka ruma. “Papa boooos, ada bekin apa? Tolong kasi beta sat glas do. Haus na,” laklaki omong sambel lap karingat.
“Beta ni baru dar pasar. Doi su abis makanya be jalan sa. Cape e,” laklaki mengelu lai.

“Makanya, adi pi kas tau pemerenta to. Itu tu, ator dolo pasar yang it hari dong bangun di kotong pung kampung sini. Masa bangun abis kas tenga? Pemerenta pung karja model apa?” Ama Tobo yang su flai, omong deng suara asrang pung.

“Itu su. Beta ju son abis pikir. Dong yang bekin rencana, dong yang bangun itu pasar, trus dong lai yang son atur ko pake. Omong-omong ma pemerenta dong ju sama sa. Son tau tanggung jawab,” Sulabei son pake pele-pele. Langsung serang di jantong.
Dengar bagitu, Ina Feok ju nae dara. “Jujur sa, itu pasar tu son ada guna sama skali. Ko liat sa, mana parna orang datang ko bajual di itu tampa. Son ada kan? Makanya, kalo mo pili orang tu, liat yang batul-batul pung. Jang cuma dengar dia pung janji, karna janji tu lebe banya omong kosong.

” mamtua pung carewet su mulai kaluar.
“Ihhh, papa e, darpada kotong ulas kas abis energi, lebe bae lu kasi beta energi do. Raba be pung ini ni, yang dibawa ni,” maitua omong sambel katawa. Liat bagitu, Sulabei ju langsung pamit. “Aui, siang-siang ju foee,” laklaki ganggu.