Batasibu

AMA Tobo su pi kampong ko mo beli kapur puti. Bapatua ada mo cet dia pung pagar dari bebak deng warna puti karna lai sadiki su mau 17 Agustus na. Ma andia, Bapatua pulang, bukan bawa kapur ma piko bambu.

Ina Feok kakadok karna dia pung laki ada batasibu deng hal yang dia pikir tar ada guna. "We, ko lu piko itu bambu buat apa. Lu mo bekin degu-degu ko. Mo taro di mana lobang lai. Kintal su kici ana bagini ma, lu mo tamba deng degu-degu lai," Ina Feok mangomel deng dia pung laki.

Ama Tobo lia dia pung bini pung muka yang su ampat pulu lima, bapatua bukan mara, ma senyum. Ina Feok tamba kakodok lai.

"Makanya, jang suka mangomel dolo, kalo sonde tau. Jang orang bolom kas tau apa-apa, lu su sama ke yang paling tau sa," Ama Tobo dudu sante sambil kas nae kaki di atas karosi ko minta kopi panas di dia pung bini.

Ina Feok, su balangsik sa, karna dia pikir ama Tobo kasi abis doi sa. Padahal dia ada mo pi beli cet ko mo cet ame dong pung ruma yang su dadolek mati pung. "Ruma sa su kamomos bagini macam, bukan pi beli cet, ma pi beli itu bambo banya-banya. Tartau mo bekin apa macam e."

Ama Tobo baganggu lai dia pung bini. "Ko lu pi eo ame kopi kasi beta dolo, baru beta kas tau deng lu, ini bambu mo bekin apa."

Muka asam ma Ina Feok bangun ko pi eo kopi. Dia sangaja kasi gula sapoong ana sa, biar ko dia pung laki minum kopi pait. Biar kasi kopi pait, ju ama Tobo sonde mara. "Ini bambu ni, beta beli banya-banya karna beta mo jual lai. Lu tau ko sonde, nanti lai sadiki lai, orang dong su bacari bambu karna su mau peringati hari kemerdekaan, bambu pung harga jadi mahal. Kotong bisa dapa ontong sadiki. Lumayan, kalo satu bambu dapa dua stenga, kan. Makanya jang mangomel. Otak bisnis tu musti jalan. Kamarin sa, kotong pung tatangga su mo pi cari bambu buat bekin tiang bendera. Lu lia to, su ada pasar ni."

Ina Feok hanya goyang kapala sa. Dalam hati, dia bilang ternyata dia pung laki ni bisa ada otak bisnis ju. Biar dapa doi sadiki, yang penting ada to?. (hermina pello)