Tapaleuk, Tarima Penghargaan 

POS-KUPANG.COM, KUPANG - Ama Tobo pung badan son enak, ko dia bangun su siang tarang.

Soalnya dia kemarin ada ikut acara di partai dong sosialisasi. Tobo ju masok pengurus salah satu parte na.

‎"Ama lu su kanapa bangun lat bagini. Lu sonde liat beta ada sakit bagini, son bisa bangun sedu ko bamasak," Ina Feok mengomel dia laki.

Ama Tobo yang dengar, diam-diam sa, ma dia son mo turun dar tampa‎ tidor.

Baca juga: Tapaleuk: Jang Cari Posisi Aman  ‎

‎Dia masih bolak-balik badan te dia dengar Bai Ndu pung suara su selamat pagi di muka ruma.

Tobo langsung bangun ko kaluar kamar. Dia liat Ina Feok, dia munafik ko ulik-ulik dia pung mata.

‎"Dari mana ni, ko papagi lu su muncul lai. Beta badan son enak andia ko baru bangun," Tobo duduk pangku kaki ko baru tanya Bai Ndu.

"Beta ini hari datang ko cek koran ko mo baca, te kamarin beta pi ame pensiun, orang dong ada baomong bilang Pos Kupang ada kasi penghargaan ato awards," Bai Ndu kasi keluar dia pung roko saliti ko taro di meja, dia bangga karna bisa omong penghargaan pake bahasa Inggris.

Ama Tobo tadi malam tidor lat karna dong ada siap-siap mo pi tarima penghargaan.

"Ini acara kasi penghargaan rame juga ama e, jadi samua yang iko acara sanang sakali," Tobo omong di Bai Ndu.
Tobo mulai carita panjang lebar soal penghargaan.

Baca juga: Tapaleuk, Orang Dong Puji Katong

Ina Feok yang ada tidor di kamar dengar sama ke ada dosen kas kuliah di kampus.

"Woe bosong dua foe apa ini, bacarita sama ke ada‎ mahasiswa kuliah," Ina Feok togor dong dua.

"Ina katong ada omong soal penghargaan, soalnya tadi malam Ama Tobo ada dapat carita  di tetangga na," Bai Ndu jawab Ina Feok.

"Ama e, beta omong ini karna bosong dua baribut soal itu award ko apa. Beta ada dapat info jadi lebe bae katong nanti lihat ko baca di berita online ato koran pasti ada," Ina Feok omong kasi jalan di dia pung laki deng Bai Ndu. (Oby Lewanmeru).

Ikuti Berita POS-KUPANG.COM Lainnya di GOOGLE NEWS