Tapaleuk: Jang Cari Posisi Aman  ‎

POS-KUPANG.COM, KUPANG - Bai Ndu  su bartobat andia ko sakarang son isap rokok lai.

Di dia pung rumah ju su sonde ada tampa abu rokok lai

Dia tiap hari su bawa oto grab masok sampe di kantor-kantor dong.

Baca juga: Tapaleuk: Maen Dua kaki

"Ama lu itu hari beta su bilang kalo lu mao na bawa beta pung oto sa," Ama Tobo tawar Bai Ndu.
Ini hari dong samua ada makan di Ama Tobo pung rumah karna Bai Ndu ulang taon. Dia ultah ma son ada yang bamasak andia dia pi minta tolong Ina Feok  bamasak.

"Katong omong-omong ma  beta ada dengar korban yang kapal tabakar itu ada yang balom dapa. Tim yang cari ju su tambah tiga hari pi cari," Ama Tobo makan puji carita karna dia baru habis baca koran na.

"Itu su, kasian itu korban, te katong ju son tao sakarang  proses hukum su sampe mana," Bai Ndu omong kuat-kuat 

"Ina sakarang ini katong musti iko tarus dia pung perkembangan, te samua orang ju ada cek tarus,apalai yang keluarga korban dong," Tobo jawab dia pung bini.

Dong tiga hamper tiap hari bacarita soal kapal sa karna su banyak makan korban.

Baca juga: Tapaleuk: Su Mau Musim Tanam

"Beta mo omong deng bosong dua ma beta taku jang sampe bosong dua kas bocor lai na sudah. Beta ju taku nanti ada yang posting tambah-tambah," Bai Ndu omong pelan-pelan.

"Ama e, ko lu sama ke orang laen sa. Kalo lu omong ju katong mo bikin apa‎," Ina Feok omong sang Bai Ndu.

Bai Ndu taku omong karna dia dapa informasi bilang kapal yang tabakar itu banya kejanggalan na.

"Bai Ndu biar lu son mo omong ju, beta tadi su dengar, jadi lu liat sa pasti nanti ada yang kana. Polisi su periksa bagitu pasti dapa orang yang bertanggung jawab," Ama Tobo pangku kaki di depan Bai Ndu.

"Ina deng Ama, beta sebenarnya son mo omong tapi beta su anggap bosong dua beta pung sodara,jadi be mo kastau, sakarang ini ada banyak‎ yang takut soalnya polisi ju son maen-maen usut ini kasus,makanya ada yang mo cari posisi aman ju son bisa," akhirnya Bai Ndu mulai kas kaluar dia pung rahasia samua.‎(oby lewanmeru)
 

Ikuti Berita POS-KUPANG.COM Lainnya di GOOGLE NEWS