Tapaleuk
Tapaleuk, Tanam Jagung Panen Sapi
Dalam hati Bai Ndu maki ancor sang Ama Tobo tagas ada motor gaul sa ma bagaya mo mati
lihat foto
Tapaleuk, Tanam Jagung Panen Sapi
POS-KUPANG.COM, KUPANG - Papagi buta Ama Tobo su siap deng dia pung oarang tofa deng linggis mo pi tanam jagung di kobong di Naioni sana.
Baptua son mau ajak dia pung bini te terakhir kali dia ajak mamtua bilang takut hitam.
Bapatua nae motor supra lama yang dia beli dar Bai Ndu yang waktu masih muda dulu pacaran dengan dia pung bini biasa pake gonceng.
Baca juga: Tapaleuk: Jang Cari Posisi Aman
Pas sampe depan cabang ju dia nae katumu Bai Ndu. "We ana papagi mo pimana ni, su putar profesi ojek ko," Bai Ndu tanya naen gila.
"Beta mau pi tanam jagong di kobong sana, ke Bai Ndu yang gigi sonde ada lae na mending beli beras ko masa bubur sa," Ama Tobo balik jawab maen gila.
"Beta tanya serius ni, lu ada kebun berapa hektar oo ko bibit bawa 25 kilo nii, beta rasa itu kebun 10x10 meter," Baptua omong sonde jaga perasaan.
Ama Tobo dengar itu ju ke tensi agak naek, dia rasa Bai Ndu anggap remeh sang dia.
"Bagini ama, biar kebun 10x10 ju beta bisa batanam ko makan, ada sayur, ada jagung, ada lombok, beta bisa batanam apa sa tambah lae beta bisa piara sapi, intinya istilah keren sekarang TJPS," Ama Tobo jelaska kasi Bau Ndu.
Baca juga: Tapaleuk: Muka Masnanaok
"TJPS tu apa? Umur-umur beta baru dengar ni, jang sampe dia pung arti Tomat Jagung Pisang Sawi ko?," Bai Ndu tebak-tebak sa.
"Hiii we tua itu dia pung arti Tanam Jagung Panen Sapi atau TJPS, gubernur pung program, baptua mo tanam hektar-hektar ma biar beta pung tanah cuma 10x10 meter beta usaha tanam sa. Ehh ama ondor jauh-jauh dolo jang pele beta, beta mo po tofa deng tanan jagung dolo, daa baitua," Ama Tobo lansung gas motor bikin baasap di depan Bai Ndu pung muka.
Dalam hati Bai Ndu maki ancor sang Ama Tobo tagas ada motor gaul sa ma bagaya mo mati.(Ryan Tapehen)
Ikuti Berita POS-KUPANG.COM Lainnya di GOOGLE NEWS
