Tapaleuk: ‎Kebun Balom Barisi Ni

POS-KUPANG.COM, KUPANG - Ina Feok baru sampe rumah langsung dia maruak sampe Bai Ndu yang duduk deng Ama Tobo kaget.

Bai Ndu su perasaan jang sampe karna dia pi ko ajak Tobo bacarita andia ko mamtua mangomel sama Tobo.

Ama Tobo yang su perasaan deng Bai Ndu andia ko dia sengaja injak Bai Ndu pung kaki ko ada maen mata sadiki.
Bai Ndu langsung tao kalo Tobo su tendes mata itu berarti aman sa.

Baca juga: Tapaleuk : Sopir Mati Banyak

"Lu di rumah ju sama ke patung sa ko sonde bisa kasi masok pakian dong ko. Tadi lu tuli ko sonde dengar itu ujan babunyi ju ko," Ina Feok su masok kamar ma dia masi mangomel.

Dengar bagitu baru Bai Ndu tao bilang ternyata karna Ama Tobo sonde angka pakaian di tali jemuran sana ‎.

"Ama ko lu kenapa tadi sonde kas maso pakian dong," Bai Ndu bisik sang Tobo.

"Diam-diam te beta ju baru pulang ko tadi katumu kawan dong ada duduk di pak laru sana. Pas hujan beta son bisa pulang na," Ama Tobo ju omong ma dia pung mata ada liat pi pintu kamar sana.

"Sakarang ini su mulai ujan, ko tadi beta di pasar sa samua orang balari pi pinggir toko, ma ko ini di rumah te son bisa angka pakian," Ina Feok keluar ko liat itu pakian dong di tali.

Baca juga: Tapaleuk: Selamat Ulang Taon Indonesia

"Ina e, itu pakian dong bisa karing, ma sakarang ini beta ada pikir  katong pung kebon yang balom tofa abis. Klo ujan datang na, katong son bisa batanam," Tobo omong bardiri jao ko baru omong te dia takut Ina Feok cium bau laru.

"Batul Ama Tobo, lu omong bagitu te beta ju balom pi kas barisi kebon. Katong kalo son pikir itu kebon nanti orang laen makan jagong muda te katong hanya bisa menonton sa," Bai Ndu garu-garu kapala.

Ina Feok yang dengar bagitu, dia ju mulai pikiran te dong pung kebon juga balom barisi.

"Itu su ama e, beta di pasar tadi ju pikiran te kalo hujan turun tarus berarti katong harus tanam jagong su. Tapi karmana mo tanam te kebon balom siap," Ina Feok su kas turun nada

"Ama karmana na besok ini katong gotong royong tofa kebun su. Satu hari di beta pung abis itu pinda pi ama dong pung. Kalo satuju besok katong mulai karja su," Bai Ndu tawar kerja sama-sama supaya cepat abis.‎(oby lewanmeru)

Ikuti Berita POS-KUPANG.COM di GOOGLE NEWS