Iko Tes Pegawe

Bapa nanti bilang apa, beta siap laksanakan. Mau pukul orang ju beta siap. Itu yang beken itu orang terharu.

BAI Ndu su pamalas ojek. Baitua mau coba iko tes pegawai honor. Dong bilang ada buka. Intinya ada ijasah, boleh pi ko daftar.

Ma ini kali bilang pake tes. Bai Ndu sonde ada masalah. Tiap hari nonton felem Korea, jadi ada sadiki mangarti dunia luar.

Pas mau tes, ayam masih kokoreu dua kali, Bai Ndu su siap. Sisir miring, baju isi dalam. Sampe di aula, Bai Ndu yang pertama hadir. Bai Ndu dapat galiran nomor tiga.

Nomor satu kaluar deng muka babangka. "Dong tanya bilang 100 tambah 100 berapa. Beta jawab 250 yang tes bilang salah. Katanya jawaban begitu tu, nanti su lulus, tukang koropsi."

Nomor dua maso lai. Kaluar denga muka asam, Sonde lulus. "Dong masih tanya yang sama. Beta jawab 150, dong bilang salah. Nanti kalo su lulus, beta beken rugi negara. Negara harus dapat 200, beta kas kurang 50."

Bai Ndu pikir keras. Ama Tobo yang antar, dada su tagoyang. Ini alamat Bai Ndu sonde akan lolos. Tapi Bai Ndu percaya diri maso. Sonde sampe lima menit, baitua keluar. Baru sampe pintu, Bai Ndu su batareak.

"Akhirnya beta bisa jadi PNS. Sonde ojek ais bajual laru lai. Baitua yang tes bilang beta lulus."

Ama Tobo heran. Buta kanop ke Bai Ndu bisa lulus juga.

"Nyadu jangan heran. Pertanyaan masih sama. Beta jawab simpel sa. Beta bilang bos ator sa. Bapa nanti bilang apa, beta siap laksanakan. Mau pukul orang ju beta siap. Itu yang beken itu orang terharu. Dia bilang beta sangat pengertian na." **

Penulis: Sipri Seko
Editor: Sipri Seko
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved