Tapaleuk : ‎Kasih su talalu Jaoh

POS-KUPANG.COM--Ama Tobo ini hari rencana mau pi pasar hewan, dia mau cari ayam bibit ko mo piara. Andia dia su siap mo jalan.

Ini hari ju dia musti pi iko sosialisasi karna dong pung tetangg juga calon DPRD na ko ada sosialisasi dekat dong rumah‎.

Ina Feok ada tasibu bikin kue ko mo bajual di dong pung muka rumah.

"Ama lu mo pi mana ko su siang bagini sonde di rumah ko apa," Ina Feok su mengomel dia pung laki.

Ama Tobo sonde pusing te dia su nekat mo beli ayam di pasar hewan. Ini pasar hewan yang terkenal hanya satu yang ada di dekat Camplong sana.

• Kondisi Korban Diduga Keracunan di TTS Terus Membaik

Ternyata Ama Tobo balom jalan te Bai Ndu su datang . Bai Ndu bastel mati pung deng pake kacamata hitam.

Ina Feok yang liat Bai Ndu su datang te dia sangaja buang bahasa ke Tobo. "Andia lu pung biasa pas ada kerja di rumah baru lu mulai ilang. Lu tao ko sonde, sebentar sore lai bosong mo bajalan pi iko orang kampanye ko apa," Ina Feok bangun ko su pi bajual kue.

Ama Tobo langsung ajak Bai Ndu ko pi pasar sana. Dong dua pi cepat sa karna hanya cari ayam satu ekor sa.

Ina Feok masih bajual ko balom abis te Bai Ndu deng dia pung laki su turun dari motor.

"Bosong dua pi bikin apa sa ko cepat," Ina Feok tanya Tobo.

Tobo hanya senyum ko maso dalam rumah.

• Anda Sering Tidur dengan Kipas Angin Menyala? Hentikan Sekarang, Atau?

"Ama lu kamarin ada dengar orang dong ada bakalae karna ada basalingkuh ko sonde," Bai Ndu tanya Tobo.
"Sapa yang bakalai Ama, dong bakalai soal apa," Tobo langsung tanya Bai Ndu.

Bai Ndu langsung carita soal orang dong bakalae karna salingku jadi smpe babunuh.

Bai Ndu ju tiap hari iko perkembangan berita di dia pung hape. Baru-baru dia pung ana mantu ju ada kirim kasi dia hape cina yang bisa internet.

Andia ko bapatua tiap hari maen online. Tetangga dong su pange. Bai Ndu Opa gaul.

Bae ko Bai Ndu pung ana mantu beda dapil deng Ama Tobo jadi aman.

Tobo yang dengar itu carita dia bangun ko pindah pi dudu deka Bai Ndu.

"Beta ini ju su ada ana mantu ma andia son kasi beta hape. Kalo ada sa mangkali katong dua bisa WA tarus,"Ama Tobo bikin muka kasian.

Bai Ndu serius dengar supaya dia pulang kastao dia pung ana mantu bilang ada dapa puji dari Tobo.

Ama Tobo yang dar tadi panasaran bilang orang ada bapotong ko sampe mati,andia ko dia tanya Bai Ndu.

Bai Ndu rogo hape dari saku celana ko buka internet. Ama Tobo geser ko tamba dekat Bai Ndu. Dia mo keker itu hape pung merek apa.

• Wanita Ini Akhirnya Menikah Setelah Lamarannya Selalu Ditolak Selama 14 Tahun

‎"Ama beta kemarin itu langsung pi lia itu orang yang kena tikam piso.Sadis juga ama, beta langsung cek kenapa sampe bagitu, ternyata bilang masalah salingkuh ko,"‎ Bai Ndu omong ma dia pung mata ada baca berita itu di hape.

Am‎a Tobo tambah tanganga lai soalnya Bai Ndu carita sama ke orang ada baca berita. Dia sonde tao Ama Tobo ada maloi ko mo cek hape pung merek.

‎"Beta su omong beta pung ana mantu deng kaluarga dong. Bahwa katong ini‎ harus saling mengasihi. Ini kota bilang Kota Kasih, ma kenapa itu kasih talalu jaoh," Ama Tobo pangku kaki karna dia liat Ina Feok ada datang bawa kopi kasi dong dua. (oby lewanmeru)