Ikan Tunjuk

BAI Ndu pung kebiasaan kalo makan harus dete garam deng bawang merah na. Lu mau makanan enak empat sehat lima sempurna kermana ju tetap, garam deng bawang harus tetap ada na. Orang bilang, ini kebiasaan yang kampungan ju bapa tua mana toe.

Andia ko ini pagi bapatua ada ba ame deng Ina Feok gara-gara dia ada cabut bawang di rebis rumah na. Ina Feok ada bajaga satenga mati ko pagar tinggi-tinggi supaya ayam jang masok ko ma isi ame, te bapa tua su cabut satu-satu. Ko ais mo kermana ooo...! Su tau minggu ni Ina Feok barenti beli bawang na. Bawang pun harga su lari lewat baras deng jagong. Sayur sa mamtua pake rubus sa na.

Sayur memang Bai Ndu sonde soal, ma kalo su masok bawang deng garam, Ama sonde bisa tahan na. "Ina ee..! Lu sonde bisa kasian deng beta ko? Lu mau larang beta makan siri pinang, isap rokok atau minum laru beta iko sa, ma kalo bawang jangan ee..!"

Lu mo rayu kermana ju Ina sonde mau tau na. "Ama mau tau, bawang tu jang maen-maen. Kalo satu dua minggu lai beta gali dan jual, oto ju kitong bisa beli na. Sakarang sa di Pasar Naikoten deng Oeba satu kilo su sampe ampat puluh ribu. Kalo beta gali ini ko sampe saratus kilo pikir sonde ontong banyak."

Ina Feok maruak sonde bisa tahan lai. Aer lurah malele ko baterbang kiri kana su ke aer mancur di bundaran El Tari sa. Tau to. Mamalele satu ni kalo bahitong doi su lebe dari cina na. Lu mau ade ko, kaka ko, suami ju mamtua sonde mau tau na.

"Ama baca di koran ais dengar di radio ko sonde. Di mana-mana sakarang bukan hanya bawang sa, samua barang iko nae abis. Kalo kitong sonde itong bae-bae, bisa mati badiri. Doi mau beli beras sa sonde sampe ke doi beli gula garam dong. Makanya sakarang hemat-hemat su. Makan pake ikan tunjuk sa ju bae."

Bai Ndu sonde bisa omong banyak lai. Bapatua ju tau. Doi mau beli makan minum sa dong dua laki bini mus pakariang siang malam baru dapat. Balom ko anak dong pung doi sakolah macam-macam, baitua pikir ju kapala tambah pusing. Kalo su bagitu, Ina Feok su tau na. Pasti tarek tangan ko masok di dalam dan selesai..! (sipri seko)