Awas Ada OPK Ana Nona

" Dia akan malu bergaul dan macam-macam. Makanya jangan maen papoko sa. Anak tasala sadikit, tampeleng."

Awas Ada OPK Ana Nona
Istimewa
Ilustrasi

AMA Tobo heran, sakarang ni, sadiki-sadiki heboh. Su barapa kali anak nona lari iko pacar, heboh di mana-mana bilang orang culik bawa. Sama sa ke dolo waktu OPK masih foe.

"Lu mengarti apa. Lu sonde tau perasaan kitong yang anak takuju ilang dari rumah. Nanti orang bilang katong sonde bisa jaga ini anak dong. Beta setuju. Selaen lapor polisi, lepas di fesbuk supaya orang cari. Ais itu nanti dia tobat memang ko sonde beken lai. Di mana-mana orang akan omong dia pung nama na."

Dengar Ina Feok omong bagitu, Ama Tobo geleng kapala. "Andia lu perempuan ma sonde tau apa itu jender. Apa itu perlindungan terhadap anak. Cari diam-diam kenapa. Nanti cepat dapat ma itu anak pung mental nanti rusak. Dia akan malu bergaul dan macam-macam. Makanya jangan maen papoko sa. Anak tasala sadikit, tampeleng."

Ina Feok deng Ama Tobo batasibuk dari tadi. Dua orang sa, ma baomong ke satu kampung yang bacarita. Bacarita dari anak ilang sampe orang baselingkuh. Andia ko kalo su omong salingkuh, Ina Feok asli makan Ama Tobo na.

"Lu kenapa kalo sampe selingkuh, kitong omong lu selalu sonde mau bahas. Beta takut sa, jang sampe lu ju salah satu ni."

Ama Tobo sonde toe deng Ina Feok. Baitua pindah omong soal kas barisi kintal. Andia ko Ina Feok emosi ko bangun fuik. **

Penulis: Sipri Seko
Editor: Sipri Seko
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved