Tapaleuk : Mabok Pung Karja

POS-KUPANG.COM, KUPANG - Ama Tobo deng Bai Ndu ada duduk lingkar botol sopi deng kunyah jagong goreng di rebis rumah.

Dong dua kabas sopi su kas abis tiga botol dan mau masok botol ke empat, Ama Tobo su mulai omong harbabiruk.

Ama Tobo su omong pake nada tinggi tambah batareak hela gargantang padahal su tengah malam.

Sementara Bai Ndu ju sonde mau kalah, dong dua pung suara basambung deng nada tinggi bikin orang yang dengar pikir ada bakalai rame.

Baca juga: Tapaleuk : Sadar Umur Su Tua

Lain hal deng Ina Feok yang sonde enak deng tetangga karna dia pung laki suara tinggi langsung kaluar rumah dan suruh dong dua stop lingkar sopi.

"We, basong cukup su. Ini su malam, besok bar sambung le, tetangga pikir katong ada bakalai rame disini," Ina Feok togor deng nada tinggi.

"Ina tenang sa, katong minum ju tetap aman, sonde batarsinggung sampe batikan orang ke yang kasus kamarin tuh," Ama Tobo omong deng lantang tapi su oleng.

"Batul ina, katong ni son sambarang, minum mabok sampe bagitu macam, katong usahakan jang sampe," Bai Ndu sambung omong.

Baca juga: Tapaleuk: Jang Cari Hal Deng Narkoba

"Ho, beta hanya kas ingat sa, te sakarang kalo ane-ane nanti polisi angkut na, bawa pi kantor polisi sana, nanti mabok ilang bar kas keterangan," ina feok kas ingat macam ke ancam.

"Ina, jangan bagitu, beta son mau urusan deng pak polisi, nanti repot, na ini katong su barenti minum. Bai Ndu pulang tidor su," Ama Tobo jalan deng oleng masok rumah dan langsung tepar di kursi sofa. (christin malehere).

Ikuti Berita POS-KUPANG.COM di GOOGLE NEWS