Tapaleuk: Bikin Muka Tanganga

POS-KUPANG.COM, KUPANG - Ina Feok ada sibuk basapu kas bersih rumput di halaman rumah trus dia kaget ada satu motor datang barenti di muka rumah.

Ternyata itu Ama Tobo yang turun dari motor ojek dan turun sambil garuk-garuk kapala karna takut kena mangamok dari Ina Feok.

"Ama, motor dimana, ko su pulang nae ojek ni, ada di bengkel atau lapas buang dimana? Ina Feok pung cara tanya bikin Ama Tobo hela napas panjang.

"Jang marah Ina, tadi beta kena gae di bundaran, ada batilang rame di Bundaran Tirosa baru beta kena sidang di tempat lae," Ama Tobo jawab jujur deng Ina Feok pung partanyaan.

Baca juga: Tapaleuk: Nae Motor Musti Sapokat

"Sidang di tempat? Yang karmana tuh? Ina Feok tanya heran sambil pikir deng jari talunjuk taro di dagu.

"Itu sidang di tempat, katong kena tilang, trus polisi kasi blanko tilang, trus jaksa deng hakim yang angkat ton mulai sidang, baca pasal yang dilanggar, baru hakim tentukan denda, trus katong bayar denda tilang di depan hakim," Ama Tobo kas penjelasan rinci.

"Pengaruh bukan hanya polisi sa, tapi pak jaksa deng ibu hakim pung tanya ni bikin beta karingat alus, tambah gamatar dingin," Ama jawab deng nada manyasal.

"Bikin beta tambah pusing le tadi abis sidang, pas mau bayar denda ma rogo saku ternyata lupa bawa dompet, jadi motor masih di sana, dan denda lunas baru bisa bawa motor, makanya beta pulang deng ojek," Ama Tobo pung jawaban bikin Ina Feok mangarti.

Baca juga: Tapaleuk: Su Mau Pemilu

"Makanya kalo jalan pi mana-mana tuh usahakan lengkap samua, biar nanti katumu deng pak polisi ju modal senyum dalam sa, kalo sonde nanti dapat sidang baru bikin muka tanganga di depan hakim deng jaksa karna langgar aturan lalu-lintas," ina feok kas nasehat deng Ama Tobo biar ingat. (Christin Malehere)