Tapaleuk : Memang Lidah Tak Bertulang

POS-KUPANG.COM, KUPANG - Ama Tobo ada buka Facebook dan baca informasi tentang kunjungan Pak Presiden di Ende yang lagi viral di medsos.

Apale waktu Pak Presiden Jokowi pi kunjungi satu rumah dari Pasutri saat jam tidor malam pi kunjungan di satu rumah warga di dalam gang sampit.

Tau ko sonde, baru posisi jalan dalam gang itu tuh galap buta, dan rumah sepi trus lampu mati. Hanya ada suara anjing bagonggong di depan rumah.

Tapi pemilik rumah son ada, laki bini ada sibuk di belakang rumah potong sayur, jadi tetangga yang batasibuk pi panggil kastau dong dua laki-bini supaya datang karna Pak Jokowi ada datang bertamu di dong dua punya rumah.

Baca juga: Pengamat Politik Ahmad Atang: Jauh Lebih Pancasilais

"Coba seandainya Pak Jokowi ju datang Kupang baru sempat kunjung pi katong pu rumah ni karmana? Posisi rumah ada tasiram ke kapal pica, " Ama Tobo omong sindir Ina Feok yang ada duduk iris labu lilin.

Ina Feok diam son respon tapi su mulai iris labu deng banting piso di papan iris, trus Ama Tobo sambung, "kalo Pak Jokowi datang baru liat sapu ada di ruang tamu, lante kotor belom pel kas bersih, sampah di depan rumah masi tasiram, bunga di pot ju su kering karontang, awi, mau jadi apa su," Ama Tobo tambah kas panas.

"Kalo su liat bagitu macam na kerja kas beres su to, jang tunggu le, karna Pak Jokowi su dalam perjalanan datang sini," Ina Feok balas deng nada emosi.

Baca juga: Naikkan Suku Bunga Sepihak, Nasabah di Kupang Gugat PT BNI 

Ama Tobo yang sadar deng situasi Ina Feok su emosi langsung pake jaket dan ambil kunci motor yang di gantungan trus ambil helm trus langsung tancap gas "Ina beta pi ojek do, pelanggan su telpon pi jemput di pasar ni".

"Tadi bilang Pak Jokowi mau datang, ma ini rumah ada tasiram bagini macam, baru son ada gerakan menyimpan rumah ju, sekarang alasan mau pi jemput pelanggan, memang lidah tak bertulang betul," Ina Feok omong sambil malerok terus pi Ama Tobo yang su kaluar rumah pi ojek. (Christin Malehere)