Jaga Bae Bae itu Dapil

POS-KUPANG.COM|KUPANG--Ama Tobo ini hari rencana mau pi belanja di tampat jual pakian bekas dong. Andia dia su siap mo jalan.

Ini hari ju dia musti pi iko sosialisasi karna dia juga calon DPRD na.

Ina Feok ada tasibu bikin kue ko mo bajual di dong pung muka rumah.

"Ama lu mo pi mana ko su siang bagini sonde di rumah ko apa," Ina Feok su mengomel dia pung laki.
Ama Tobo sonde pusing te dia su nekat mo beli jeket di tampat jual RB.

Ternyata Ama Tobo balom jalan te Bai Ndu su datang . Bai Ndu bastel mati pung deng pake kacamata hitam.

Ina Feok yang liat Bai Ndu su datang te dia sangaja buang bahasa ke Tobo. "Andia lu pung biasa pas ada kerja di rumah baru lu mulai ilang. Lu tao ko sonde, sebentar lai bosong mo bajalan pi kampanye ko apa," Ina Feok bangun ko su pi bajual kue.

• Satu Kantong Merah Tanpa Suara! Aksi Mahasiswa Biologi Undana Saat Menyisir Pantai Kota Kupang

• Si Mulut Seribu di Daiama, Tak Sekedar Menebar Rumpon, Pesonanya Bikin Betah Seharian

Ama Tobo langsung ajak Bai Ndu ko pi pasar sana. Dong dua pi cepat sa karna hanya beli jeket sa.

Ina Feok masih bajual ko balom abis te Bai Ndu deng dia pung laki su turun dari oto.

"Bosong dua pi bikin apa sa ko cepat," Ina Feok tanya Tobo.

Tobo hanya senyum ko maso dalam rumah.

"Ama lu kamarin ada dengar orang dong ada bakalae ko sonde," Bai Ndu tanya Tobo.

"Sapa yang bakalai Ama, dong bakalai soal apa," Tobo langsung tanya Bai Ndu.

Bai Ndu langsung carita soal orang dong bakalae karna masok di tampa kampanye yang sama.

Bai Ndu ju tiap hari iko perkembangan kampanye karna dia pung ana mantu ju ada caleg na.

Bae ko Bai Ndu pung ana mantu beda dapil deng Ama Tobo jadi aman.

Tobo yang dengar itu carita dia bangun ko pindah pi dudu deka Bai Ndu.

"Beta ini ju iko calon ma beta paling iko aturan. Coba lu bayangkan sa di beta pung daerah ini barapa orang memang yang iko calon ma beta slow sa, karna beta su jaga bae-bae itu dapil," Ama Tobo omong di Bai Ndu.
Bai Ndu serius dengar supaya dia pulang kastao dia pung ana mantu.

"Beta bersyukur katemu ama ini hari karna beta bisa dapat bekal ko kastao ana mantu. Beta liat beta pung ana mantu Iko kalo iko Ama Tobo pung cara jaga dapil, beta yakin dia bisa dapa suara," Bai Ndu su mulai kas makan puji Ama Tobo.

"Ama beta pung cara itu sederhana sa ma basong liat to beta su brapa periode di dewan," Tobo mulai makan puji ko omong pangku kaki trus.

Karna Bai Ndu angka-angka trus andia Tobo tambah senang ko dia carita samua cara yang dong pake kampanye selama ini. "Pokoknya bagitu , sonde boleh kasi tenga katong pung dapil ko orang laen maso. Harus katong jaga bae-bae karna orang sakarang su mangarti samua. (oby lewanmeru)