Amper Lupa Kalo Ada Paskah

"Andia lu pung model tu. Sonde tau gareja. Jang beken ke orang halaik. Pi maloe di gareja sana te orang samua batakumpul tu."

Amper Lupa Kalo Ada Paskah

AMA Tobo pung bini su basatel dari papagi. Mamatua sonde pikir bamasak, basapu, ato bacuci ko apa. Mamatua su siap mo jalan. Ama Tabo ju agak tahedek lia dia pung bini su bagaya. Bapatua setel ame koran ko baca barita ma dia pung kopi bolom ada. Biasa papagi, baitua minum kopi sambil baca koran na.

"We, lu su mo pi mana ni. Mana beta pung kopi. Lu tar inga tugas lai ko," Ama Tobo batareak dia pung bini yang su badiri di rebis rumah sambil gepe ame tas kici ana di kateak.

Mamtua sonde manyao deng bapatua. Mamtua langsung hela ama dia pung ana parampuan pung tangan ko pi kas tenga Ama Tobo. Mamtua bekin ke malas tau na.

"Lu ni tau ko sonde. Sakarang Paskah. Orang beken kegiatan banyak di gareja. Andia lu pung model tu. Sonde tau gareja. Jang beken ke orang halaik. Pi maloe di gareja sana te orang samua batakumpul tu."

Ama Tobo takuju. Dia su sonde ingat lai ada Paskah. Talalu batasibu ribu deng pemilu, baitua su lupa Paskah. Ina Feok sonde toe lia Ama Tobo dudu ko tanganga.

"Andia ko bosong yang katua RT tu, laen kali kastau itu pamarentah dong. Beken pemilu jang iko mau. Lia kitong juga. Ini orang ada mau Paskah, beken bakalai sa deng pemilu. Laen kali kalo orang sonde mau pilih na farek deng bosong samua."

Ama Tobo sonde sambung dia pung maitua. Kopi deng gula masih ponu di tofles. Baitua mo beken ma lia pi te aer panas di termos kosong. Mo bamasak aer, pamalas. Ko ais bapa tua paling sonde hobi tole ko batiup api na. **

Editor: Sipri Seko
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved